លោកជំទាវរដ្ឋមន្ត្រី អុឹង កន្ថាផាវី អញ្ជើញប្រកាសឱ្យប្រើប្រាស់ជាផ្លូវការកញ្ចប់ឧបករណ៍និងគោលការណ៍ណែនាំសម្រាប់ការធ្វើមូលដ្ឋានីយកម្មអាស៊ាន

ភ្នំពេញ៖ លោកជំទាវ អុឹង កន្ថាផាវី រដ្ឋមន្ត្រីក្រសួងកិច្ចការនារី បានអញ្ជើញជាអធិបតីក្នុងពិធីប្រកាសឱ្យប្រើប្រាស់ជាផ្លូវការកញ្ចប់ឧបករណ៍និងគោលការណ៍ណែនាំសម្រាប់ការធ្វើមូលដ្ឋានីយកម្មអាស៊ាននិងសិក្ខាសាលាលើកកម្ពស់ចំណេះដឹងអំពីការធ្វើមូលដ្ឋានីយកម្មស្តីពី ស្ត្រី សន្តិភាព និងសន្តិសុខ នៅព្រះរាជាណាចក្រកម្ពុជា ( Launch of the ASEAN Localization Toolkit and Guideline and Awareness Raising Workshop on Localization of Women, Peace and Security in Cambodia) នៅថ្ងៃទី១៤-១៥ ខែធ្នូ ឆ្នាំ២០២៣ នៅសណ្ឋាគារ Raffles Hotel Le Royal រាជធានីភ្នំពេញ។

ពិធីប្រកាសឱ្យប្រើប្រាស់ជាផ្លូវការកញ្ចប់ឧបករណ៍និងគោលការណ៍ណែនាំសម្រាប់ការធ្វើមូលដ្ឋានីយកម្មអាស៊ាននិងសិក្ខាសាលាលើកកម្ពស់ចំណេះដឹងអំពីការធ្វើមូលដ្ឋានីយកម្មស្តីពី ស្ត្រី សន្តិភាព និងសន្តិសុខ ត្រូវបានរៀបចំឡើងក្រោមការសម្របសម្រួលរបស់ក្រសួងកិច្ចការនារី និងអង្គការសហប្រជាជាតិស្រ្តី(UN Women) ក្នុងគោលបំណង៖
១.លើកកម្ពស់ចំណេះដឹងពាក់ព័ន្ធនឹងរបៀបវារៈស្តីពី ស្ត្រី សន្តិភាព និងសន្តិសុខ ជូនដល់ភាគីពាក់ព័ន្ធសំខាន់ៗរបស់រាជរដ្ឋាភិបាលនៃប្រទេសកម្ពុជា និងអ្នកតំណាងមកពីអាស៊ាន។
២.លើកកម្ពស់ភាពពាក់ព័ន្ធនៃកិច្ចខិតខំប្រឹងប្រែងរវាងការអនុវត្តផែនការសកម្មភាពថ្នាក់តំបន់និងការធ្វើមូលដ្ឋានីយកម្មនៅថ្នាក់ជាតិលើរបៀបវារៈស្តីពី ស្ត្រី សន្តិភាព និងសន្តិសុខ តាមរយៈការប្រើប្រាស់កញ្ចប់ឧបករណ៍ និងគោលការណ៍ណែនាំនៃផែនការសកម្មភាពថ្នាក់តំបន់ ស្តីពី ស្ត្រី សន្តិភាព និងសន្តិសុខ។
៣.ចែករំលែកបទពិលោធន៍និងមេរៀនដែលបានសិក្សាពីប្រទេសផ្សេងៗនៅក្នុងតំបន់ រួមទាំងគំរូនៃផែនការសកម្មភាពថ្នាក់ជាតិ ស្តីពី ស្ត្រី សន្តិភាព និងសន្តិសុខ។
៤.កំណត់សកម្មភាពជាអាទិភាពដែលពាក់ព័ន្ធនឹងប្រទេសកម្ពុជា ចេញពីផែនការសកម្មភាពថ្នាក់តំបន់ ស្តីពី ស្ត្រី សន្តិភាព និងសន្តិសុខ។

ពិធីប្រកាសឱ្យប្រើប្រាស់ជាផ្លូវការកញ្ចប់ឧបករណ៍និងគោលការណ៍ណែនាំសម្រាប់ការធ្វើមូលដ្ឋានីយកម្មអាស៊ាន មានការអញ្ចើញចូលរួមពីថ្នាក់ដឹកនាំក្រសួងស្ថាប័នពាក់ព័ន្ធ អង្គទូត គណៈកម្មការអាស៊ានស្តីពីស្រ្តី គណៈកម្មាធិការអាស៊ានស្តីពីការលើកកម្ពស់សិទ្ធស្រ្តី និងកុមារ ស្ថាប័នតាមវិស័យពាក់ពន្ធ័នឹងអាស៊ាន និងលេខាធិការដ្ឋានអាស៊ាន សរុបចំនួន ១០០នាក់ ៕