ឧត្តមសេនីយ៍ទោ សោម ស៊ុន ផ្សព្វផ្សាយគោលនយោបាយភូមិ-ឃុំមានសុវត្ថិភាព បំពាក់ឯកសណ្ឋាន និងវិទ្យុទាក់ទង ជូនប្រជាការពារ នៅឃុំក្រយា ស្រុកសន្ទុក
ភ្នំពេញ៖ នៅថ្ងៃទី១៥ ខែធ្នូ ឆ្នាំ២០២៣ ឧត្តម សេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានគណៈបញ្ជាការឯកភាពរដ្ឋបាលខេត្ត បានអញ្ជើញទៅសំណេះសំណាលសាកសួរសុខទុក្ខ ផ្សព្វផ្សាយគោលនយោបាយភូមិ.ឃុំ មានសុវត្ថិភាព និងពង្រឹងតួនាទីភារកិច្ច សិទ្ធិរបស់ប្រជាការពារ ព្រមទាំងបំពាក់ឯកសណ្ឋាន និងវិទ្យុទាក់ទងជូនប្រជាការពារ ដែលត្រូវបានរៀបចំជាបណ្ដោះ អាសន្ននៅភូមិអតីតយុទ្ធជន ដែលកំពុងរស់នៅលើដីសម្បទានសង្គមកិច្ចស្ថិតនៅឃុំក្រយា ស្រុកសន្ទុក ខេត្តកំពង់ធំ ។
លោក ភោគ ចំរើន ជំទប់ទី១ឃុំក្រយា បានឡើងរាយការណ៍អំពីសភាពការណ៍ទូទៅនៅក្នុងភូមិសាស្ត្រឃុំ និងការអនុវត្តគោលនយោបាយភូមិ.ឃុំមានសុវត្ថិភាព នៅក្នុងឃុំក្រយា ស្រុកសន្ទុក នឹងបានរាយការណ៍អំពីស្ថានភាពអតីតយុទ្ធជន ដែលកំពុងរស់នៅលើដីសម្បទានសង្គមកិច្ចស្ថិតនៅឃុំក្រយា ស្រុកសន្ទុក មានចំនួន១៤១ខ្នងផ្ទះ ដែលមានគ្រួសារចំនួន ១៦២គ្រួសារ និង ត្រូវបានរៀបចំស្នើសុំបង្កើតប្រជាការពារជាបណ្ណោះអាសន្នចំនួន ១២នាក់ ដើម្បីសហការ ជាមួយកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលប្រចាំការនៅលើដីសម្បទានសង្គមកិច្ច និងប៉ុស្តិ៍រដ្ឋបាលនគរបាលឃុំ ក្រយា ស្រុកសន្ទុក ដើម្បីធានាសន្តិសុខសុវត្តិភាពជូនក្រុមគ្រួសារអតីតយុទ្ធជន ហើយត្រូវចូលរួមសហការរក្សាសន្តិសុខ សណ្តាប់ធ្នាប់ក្នុងការអនុវត្តគោលនយោបាយ ភូមិ ឃុំ មានសុវត្ថិភាព ។
ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះបងប្អូនប្រជាការពារដែលត្រូវបានរៀបចំបណ្តោះអាសន្នទាំងអស់នេះ ដែលបានលះបង់សេចក្តីសុខផ្ទាល់ខ្លួននិងក្រុមគ្រួសារ រួមចំណែកជាមួយសង្គមជាតិ ចូលរួមក្នុងកិច្ចការពារសន្តិសុខសុវត្ថិភាពជូនប្រជាពលរដ្ឋ ពិសេសក្នុងការអនុវត្តនូវគោល នយោបាយភូមិ.ឃុំមានសុវត្ថិភាពនៅក្នុងមូលដ្ឋានភូមិ របស់អតីតយុទ្ធជនយើង ឲ្យបានយ៉ាងល្អប្រសើរ ទោះបីបងប្អូនមិនបានការទទួលស្គាល់ពីក្រសួងមហាផ្ទៃនៅឡើយក្តី តែបានការទទួលស្គាល់ជាបណ្តោះអាសន្នពីអាជ្ញាធរដែនដី ឃុំ ស្រុករួចហើយ ។
ឧត្តមសេនីយ៍ទោ សោម ស៊ុន បានណែនាំអំពីតួនាទីភារកិច្ច និងសិទ្ធិរបស់ប្រជាការពារក្នុងការចូលរួមអនុវត្តនូវគោលនយោបាយភូមិ.ឃុំ មានសុវត្ថិភាព ហើយនៅពេលខាងមុខនេះ បងប្អូនប្រជាការពារយើងត្រូវចូលរួមចំណែកសហការជាមួយអាជ្ញាធរដែនដី កងកម្លាំង ដែលមានសមត្ថកិច្ចពាក់ព័ន្ធ ក្នុងការថែរក្សាសន្តិសុខសុវត្ថិភាព ជូនប្រជាពលរដ្ឋ និងក្រុមគ្រួសារអតីតយុទ្ធជនយើងក្នុងភូមិសាស្ត្រលើដីសម្បទានសង្គមកិច្ចនេះ ។
នៅក្នុងពិធីសំណេះសំណាលនេះ ឧត្តមសេនីយ៍ទោ សោម ស៊ុន បានណែនាំមួយចំនួនដល់ក្រុមគ្រួសារអតីតយុទ្ធជនទាំងអស់ត្រូវយកចិត្តទុក ដាក់ក្នុងការបង្ករបង្កើងផលចិញ្ចឹមសត្វដោះ ស្រាយជីវភាពគ្រួសារឲ្យកាន់តែប្រសើរឡើង ហើយត្រូវខឹតខំថែរក្សាសុខភាព ជៀសវាងពីជំងឺដង្កាត់ផ្សងៗនាំឲ្យខាតបង់ថវិកា ។ បន្ទាប់មកឧត្ដមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងក្នុងនាមគណបញ្ជាការឯកភាពរដ្ឋបាលខេត្ត បានបំពាក់ឯកសណ្ឋានប្រជាការពារចំនួន១២កំប្លេ និងវិទ្យុទាក់ទងចំនួន៦គ្រឿង ដល់កម្លាំងប្រជាការពារ ដែលត្រូវបង្កើតឡើងបណ្តោះអាសន្ននេះផងដែរ ៕
