អាជ្ញាធរជាតិប្រយុទ្ធប្រឆាំងគ្រឿងញៀន រៀបចំកិច្ចប្រជុំ និងវគ្គបណ្តុះបណ្តាល ពង្រឹងសមត្ថភារាជនបន្ទោលសម្រាប់មន្ត្រីបម្រើការងារ ពាក់ព័ន្ធនឹង ភូមិ ឃុំ សង្កាត់ ស គ្មានគ្រឿងញៀន នៅខេត្តស្ទឹងត្រែង
ភ្នំពេញ៖ នាព្រឹកថ្ងៃសុក្រ ៣កេីត ខែមិគសិរ ឆ្នាំ ថោះ បញ្ចស័ក ព.ស. ២៥៦៧ ត្រូវនឹងថ្ងៃទី១៥ ខែធ្នូ ឆ្នាំ ២០២៣ ឯកឧត្ដម ឧត្តមសេនីយ៍ឯក នាក់ យុទ្ធា អគ្គលេខាធិការរង នៃអគ្គលេខាធិកាដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានអញ្ជេីញជាអធិបតីក្នុងពិធីផ្សព្វផ្សាយនិងបណ្តុះបណ្តាលការងារជូនជនបង្គោលពាក់ព័ន្ធការអនុវត្តកម្មវិធី ភូមិ ឃុំ សង្កាត់ ស គ្មានគ្រឿងញៀន ក្រោមកិច្ចសហការជាមួយការិយាល័យក្រុមប្រឹក្សាត្រួតពិនិត្យគ្រឿងញៀនថៃ។
គោលបំណងសំខាន់ក្នុងកម្មវិធីផ្សព្វផ្សាយថ្ងៃនេះសំដៅពង្រឹងបន្ថែមនូវចំណេះដឹង ចំណេះធ្វេី និងបទពិសោធន៍ការងារដេីម្បីយកទៅបំពេញការងារ និងជាធាតុចូលបន្ថែមនៃការអនុវត្តយន្តការ ភូមិ ស សំដៅចូលរួមចំណែកក្នុងការងារបង្ការ និងទប់ស្កាត់បញ្ហាគ្រឿងញៀន។
ក្នុងពិធីផ្សព្វផ្សាយនេះមានការចូលរួមពីលោក សុផាផាត់ ហ៊ីបឱសថ អគ្គទីប្រឹក្សាទទួលបន្ទុកការងារគ្រឿងញៀននៃស្ថានទូតថៃប្រចាំព្រះរាជាណាចក្រកម្ពុជា និងជាតំណាងការិយាល័យក្រុមប្រឹក្សាត្រួតពិនិត្យគ្រឿងញៀនថៃ (ONCB) និងលោក ធូ ចាន់ពៅ អភិបាលរងនៃគណៈអភិបាលខេត្ត ជាតំណាងឯកឧត្តមអភិបាលខេត្ត និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្តស្ទឹងត្រែង និងមានការចូលរួមដោយមន្ត្រីមកពីស្ថាប័ន អង្គភាពពាក់ព័ន្ធ ចំណុះរដ្ឋបាលខេត្តប្រមាណ៦៥រូប។
ថ្លែងបន្ថែមក្នុងកិច្ចប្រជុំនេះ ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការរង នៃអគ្គលេខាធិកាដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ក៏បានស្នេីសុំឲ្យអាជ្ញារមូលដ្ឋានគ្រប់លំដាប់របស់ខេត្ត ពិសេស ភូមិ ឃុំ សង្កាត់ ត្រូវធ្វេីបច្ចុប្បន្នភាពពីចំនួនស្ថិតិអ្នកប្រេីប្រាស់គ្រឿងញៀននៅមូលដ្ឋានរបស់ខ្លួនឲ្យបានច្បាស់លាស់ ដេីម្បីចាត់វិធានការឆ្លេីយតបឲ្យបានទាន់ពេលវេលានិងមានប្រសិទ្ធ។
ឯកឧត្ដម ឧត្តមសេនីយ៍ឯក អគ្គលេខាធិការរង ក៏បានគូសបញ្ជាក់ថា ជាបទពិសោធន៍ ក្នុងសកម្មភាពប្រយុទ្ធប្រឆាំងគ្រឿងញៀន ការប្រេីប្រាស់វិធានការអនវត្តច្បាប់តែមួយមុខ មិនទទួលបានជោគជ័យទេ គឺត្រូវមានការចូលរួមបន្ថែមនូវវិធានអប់រំ ផ្សព្វផ្សាយ និងការព្យាបាលនិងស្តារនីតិសម្បទានិងផ្នែកពាក់ព័ន្ធផងដែរ ៕
