ឯកឧត្តម ថោ ជេដ្ឋា ដឹកនាំកិច្ចប្រជុំការងារគណបក្សនៃគណៈកម្មាធិការគណបក្សក្រសួងធនធានទឹកនិងឧតុនិយម

ភ្នំពេញ៖ នៅថ្ងៃសៅរ៍ ៤កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែធ្នូ ឆ្នាំ២០២៣ ឯកឧត្តម ថោ ជេដ្ឋា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សក្រសួងធនធានទឹកនិងឧតុនិយម បានដឹកនាំកិច្ចប្រជុំការងារគណបក្សនៃគណៈកម្មាធិការគណបក្សក្រសួងធនធានទឹកនិងឧតុនិយម ដើម្បីពិភាក្សាការងារពាក់ព័ន្ធការរៀបចំរចនាសម្ព័ន្ធចាត់តាំងសមាសភាពគណ:ពង្រឹងមូលដ្ឋាននៅតាមឃុំទាំង១១ ទូទាំងស្រុកពញាឮ ខេត្តកណ្តាល។

បន្ទាប់ពីទទួលបានគោលការណ៍ណែនាំពីសម្តេចតេជោ ប្រធានគណបក្សប្រជាជនកម្ពុជា នៅក្នុងមហាសន្និបាតវិសាមញ្ញតំណាងទូទាំងប្រទេសប្រព្រឹត្តទៅកាលពីថ្ងៃទី៩-១០ ខែធ្នូ ឆ្នាំ២០២៣ ឯកឧត្តមប្រធានបានដឹកនាំកិច្ចប្រជុំពិភាក្សាជាមួយឯកឧត្តម លោកជំទាវជាអនុប្រធានគណបក្សក្រសួង និងសមាជិកអចិន្រ្តៃយ៍នៃគណៈកម្មាធិការគណបក្សក្រសួងធនធានទឹកនិងឧតុនិយម ក្នុងន័យប្រមូលធាតុចូល និងរៀបចំធ្វើបច្ចុប្បន្នភាពសមាសភាពគណៈពង្រឹងគណបក្សប្រជាជនកម្ពុជាទូទាំងស្រុកពញាឮ ខេត្តកណ្តាល ដើម្បីបង្កើនប្រសិទ្ធភាពការងារ និងពង្រឹងបន្ថែមរចនាសម្ព័ន្ធចាត់តាំងរបស់គណបក្សនៅមូលដ្ឋាន និងដើម្បីបន្តកិច្ចការជាមួយចលនាមហាជននៅមូលដ្ឋានស្រុកពញាឮ ឳ្យកាន់តែផុលផុស និងឈានទៅអនុវត្តផែនការបោះឆ្នោតឆ្នាំ២០២៨ ខាងមុខ ឳ្យទទួលបានជ័យជំនះបន្តទៀត ៕