អភិបាលខេត្តស្វាយរៀង ណែនាំដល់មន្ទីរពាក់ព័ន្ធត្រូវពន្លឿនការស្ថាបនាផ្លូវជនបទនានាដែលកំពុងរងការខូចខាត ឲ្យបានទាន់ពេលវេលាដេីម្បីសម្រួលដល់ការធ្វេីដំណេីររបស់ប្រជាពលរដ្ឋ
ភ្នំពេញ៖ នៅថ្ងៃទី១៦ ខែធ្នូ ឆ្នាំ២០២៣ ឯកឧត្តម ប៉េង ពោធិ៍សា អភិបាល នៃគណៈអភិបាលខេត្តស្វាយរៀង បានអញ្ជេីញពិនិត្យវឌ្ឍនភាពនៅតាមបណ្តោយខ្សែបន្ទាត់ព្រំដែនក្នុងក្រុងបាវិត ស្រុកចន្ទ្រា និងស្រុកកំពង់រោទិ៍ដេីម្បីរៀបចំប្រែក្លាយតំបន់ទាំងនេះ ទៅជាតំបន់សេដ្ឋកិច្ចពាណិជ្ជកម្ម កសិកម្ម និងការរស់នៅរបស់ប្រជាពលរដ្ឋឲ្យកាន់តែប្រសេីថែមទៀតទៅថ្ងៃអនាគត ក្នុងនោះរួមមាន ពិនិត្យទីតាំងបង្កេីតអាងចម្រោះទឹកកង្វក់,អាងស្តុកទឹកសម្រាប់ការបង្ករបង្កេីនផលរបស់ប្រជាពលរដ្ឋ ប្រព័ន្ធធារាសាស្រ្តស្រោចស្រពកសិកម្ម និងទីតាំងផ្គត់ផ្គង់ទឹកស្អាតចេញពីបឹងធំៗក្នុងស្រុកចន្ទ្រាដែលនឹងមានការរៀបចំវិនិយោគនៅថ្ងៃខាងមុខ ក្នុងនោះបានពិនិត្យលទ្ធភាពក្នុងការស្តាប្រព័ន្ធដឹកជញ្ជូនផ្លូវទឹកក្នុងស្រុកកំពង់រោទិ៍ និងច្រកព្រំដែនអន្តរជាតិព្រៃវល្លិ័ដែលកំពុងដំណេីការដឹកជញ្ជូនទំនិញចេញចូលរវាងប្រទេសកម្ពុជា និងវៀតណាមបច្ចុប្បន្នផងដែរ។
ឆ្លៀតក្នុងឱកាសនោះដែរឯកឧត្តមអភិបាលខេត្ត បានណែនាំដល់មន្ទីរពាក់ព័ន្ធត្រូវពិនិត្យ និងពន្លឿនការស្ថាបនាផ្លូវជនបទនានាដែលកំពុងរងការខូចខាតត្រូវធ្វេីការជួសជុល និងស្ថាបនាថ្មីឲ្យបានទាន់ពេលវេលាដេីម្បីសម្រួលដល់ការធ្វេីដំណេីររបស់ប្រជាពលរដ្ឋ។
ក្នុងដំណេីអញ្ជេីញចុះពិនិត្យនេះដែររួមមាន ឯកឧត្តមអភិបាលរងខេត្ត លោកប្រធានមន្ទីរ-អង្គភាពពាក់ព័ន្ធនានា លោកប្រធានសភាពាណិជ្ជកម្មខេត្ត និងមន្ត្រីពាក់ព័ន្ធមួយចំនួនទៀត ៕
