ឯកឧត្ដម ហ្សង់ ហ្វ្រង់ស័រ តាន់៖ សម្ដេចធិបតី ហ៊ុន ម៉ាណែត ស្នើនាយករដ្ឋមន្ត្រីវៀតណាម និងឡាវឱ្យមានអភិក្រមកញ្ចប់ទេសចរណ៍ប្រទេសបី គោលដៅតែមួយ
ភ្នំពេញ៖ ឯកឧត្ដម ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រីបានបញ្ជាក់ថា អំឡុងជំនួបអាហារពេលព្រឹកជាមួយ នាយករដ្ឋមន្ត្រីវៀតណាម និងឡាវ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានស្នើឱ្យមាន អភិក្រមកញ្ចប់ទេសចរណ៍ ប្រទេសបី គោលដៅតែមួយ។
ឯកឧត្ដមបានបញ្ជាក់បែបនេះនៅក្នុងសន្និសីទសារព័ត៌មាន នាយប់ថ្ងៃទី១៩ ខែធ្នូ ឆ្នាំ២០២៣ ស្ដីពីលទ្ធផលនៃដំណើររបស់សម្ដេចធិបតី នាយករដ្ឋមន្ត្រីកម្ពុជា ចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ នៅទីក្រុងតូក្យូ ប្រទេសជប៉ុន។
ឯកឧត្ដម ហ្សង់ ហ្វ្រង់ស័រ តាន់ បន្ថែមថា សេដ្ឋកិច្ចជាប្រធានបទដ៏សំខាន់ជាងគេដែរ នៃជំនួបអាហារពេលព្រឹករវាងសម្ដេចធិបតី នាយករដ្ឋមន្ត្រីកម្ពុជា ជាមួយលោកនាយករដ្ឋមន្ត្រីឡាវ និងលោកនាយករដ្ឋមន្ត្រីវៀតណាម ដែលបានអញ្ជើញចូលរួមក្នុងកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុននេះដែរ៕
