ជប៉ុនផ្ដល់ជំនួយឥតសំណងជិត ៥០ម៉ឺនដុល្លារ លើគម្រោងការបោសសម្អាតមីន និងអភិវឌ្ឍន៍តំបន់បោសសម្អាតមីនរួច នៅខេត្ដបន្ទាយមានជ័យ និងស្ទឹងត្រែង
ភ្នំពេញ៖ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) និងឯកឧត្តម KARUBE Masakazu ប្រធានអង្គការ JMAS ប្រចាំកម្ពុជា បានចុះហត្ថលេខាលើកិច្ចព្រមព្រៀងកិច្ចសហប្រតិបត្តិការ និងភាពជាដៃគូ លើគម្រោងគាំទ្រការបោសសម្អាតមីន និងអភិវឌ្ឍន៍តំបន់បោសម្អាតមីនរួច ស្ថិតក្នុងស្រុកម៉ាឡៃ ខេត្តបន្ទាយមានជ័យ និងគម្រោងគាំទ្រការបោសសម្អាតតំបន់គ្រាប់បែកចង្កោម ក្នុងខេត្តស្ទឹងត្រែង។ ការចុះហត្ថលេខានេះធ្វើឡើង នាថ្ងៃពុធ ទី២០ ខែធ្នូ ឆ្នាំ២០២៣ នៅទីបញ្ជាការ CMAC ភ្នំពេញ។
គម្រោងទាំង២ ជាការផ្តល់ជំនួយឥតសំណង មានថវិកាសរុបចំនួន ៤៩៩,១៣៥.១០ដុល្លារអាមេរិក សម្រាប់រយៈពេល១២ខែ ចាប់ពីថ្ងៃទី១៩ ខែធ្នូ ឆ្នាំ២០២៣ ដល់ថ្ងៃទី១៨ ខែធ្នូ ឆ្នាំ២០២៤។ នេះជាឆ្នាំទី៣នៃការអនុវត្តគម្រោងនេះ ដែលមានផែនការបោសសម្អាតផ្ទៃដីចម្ការមីន/គ្រាប់ ក្នុងខេត្តបន្ទាយមានជ័យ និងខេត្តស្ទឹងត្រែង សរុបចំនួន ៦៣០ហិកតា។
សូមបញ្ជាក់ថា ជាលទ្ធផលក្នុងការអនុវត្តគម្រោងខាងលើសម្រាប់ឆ្នាំទី១ និងឆ្នាំទី២កន្លងទៅនេះ អង្គភាព CMAC សម្រេចបានរំដោះផ្ទៃដីចម្ការមីន/គ្រាប់សរុបចំនួន ១,១៨៥ហិកតា រុករកឃើញ និងកម្ទេចចោល ១,៦៧១គ្រាប់។ ប្រជាពលរដ្ឋទទួលផលដោយផ្ទាល់ និងដោយប្រយោល ពីការអនុវត្តគម្រោងនេះមានចំនួន ៦៤,០១៩នាក់៕
