ក្រុមការងារក្រសួងអធិការកិច្ច ចុះធ្វើអធិការកិច្ច លើការអនុវត្តតួនាទី ភារកិច្ចការគ្រប់គ្រងសេវាសាធារណៈ ការអនុវត្តកិច្ចលទ្ធកម្មសាធារណៈ នៅស្នងការដ្ឋាននគរបាលខេត្តបន្ទាយមានជ័យ
ភ្នំពេញ៖ នាព្រឹកថ្ងៃព្រហស្បតិ៍ ៩ កើត ខែមិគសិរ ឆ្នាំថោះ បញ្ចស័ក ពស ២៥៦៧ ត្រូវនឹងថ្ងៃទី ២១ ខែធ្នូ ឆ្នាំ ២០២៣ ក្រុមការងារក្រសួងអធិការកិច្ច ដឹកនាំដោយ ឯកឧត្តម ប៊ូ បូរិន អគ្គនាយករង នៃក្រសួងអធិការកិច្ច បានចុះធ្វើអធិការកិច្ច លើការងារអនុវត្តតួនាទី ភារកិច្ចការគ្រប់គ្រងសេវាសាធារណៈ ការអនុវត្តកិច្ចលទ្ធកម្មសាធារណៈ នៅស្នងការដ្ឋាននគរបាលបន្ទាយមានជ័យ។
ពិធីនេះមានការចូលរួមពី លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងលោក លោកស្រី ឧត្តមសេនីយ៍ វរសេនីយ៍ ស្នងការរង លោក លោកស្រី នាយការិយាល័យទាំង៣១ចំណុះឱ្យស្នងការដ្ឋាននគរបាលខេត្ត។
លោកឧត្តមសេនីយ៍ទោ សិទ្ធិ ឡោះ បានជួបសំណេះសំណាល និងទទួលស្វាគមន៍គណៈប្រតិភូ និងជំរាបជូន ជុំវិញសភាពការណ៍សន្តិសុខនិងលទ្ធផលកិច្ចសហប្រតិបត្តិការ និងកម្លាំងនគរបាលនៅតាមមូលដ្ឋានបានសហការជាមួយអាជ្ញាធរនិងកម្លាំងពាក់ព័ន្ធជានិច្ច។
ឯកឧត្តម ប៊ូ បូរិន អគ្គនាយករង បានលើកឡើងថា ៖ យោងលិខិតបញ្ជាបេសសកម្ម ដែលចេញដោយឯកឧត្តម ហួត ហាក់ រដ្ឋមន្រ្តីក្រសួងអធិការកិច្ច បានចាត់តាំងគណៈប្រតិភូ០១ក្រុមដឹកនាំដោយឯកឧត្តម ប៊ូ បូរិន អនុរដ្ឋលេខាធិការ អធិការកិច្ច ជាប្រធានប្រតិភូ បានដឹកនាំក្រុមការងារ មានភារកិច្ច ចុះធ្វើអធិការកិច្ចការងារក្នុងខេត្តបន្ទាយមានជ័យ គឺនៅរដ្ឋបាលខេត្ត, រដ្ឋបាលក្រុង-ស្រុក, សាលាដំបូងខេត្ត, ពន្ធនាគារ, ស្នងការដ្ឋាននគរបាល អធិការដ្ឋាននគរបាល ក្រុង-ស្រុក មន្ទីរ អង្គភាពជុំវិញខេត្ត អង្គភាពក្រោមឱវាទ អង្គភាពពាក់ព័ន្ធ ក្នុងការិយបរិច្ឆេទ ២០២២ និងបណ្តាឆ្នាំពាក់ព័ន្ធ។ ថ្ងៃនេះក្រុមការងារបានចុះ ធ្វើអធិការកិច្ចនៅស្នងការដ្ឋាននគរបាលខេត្តបន្ទាយមានជ័យ មាន០៤ចំណុច៖ ទី១- ការងារអនុវត្តតួនាទីភារកិច្ច, ទី២-ការគ្រប់គ្រងសេវាសាធារណៈ, ទី៣-ការគ្រប់គ្រងចំណូលមិនមែនសារពើពន្ធ និងទី៤-ការអនុវត្តកិច្ចលទ្ធកម្មសាធារណៈ។
ជាមួយគ្នានោះដែរ ឯកឧត្តម ប៊ូ បូរិន អគ្គនាយករង ក៏បានថ្លែងអំណរគុណចំពោះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត ដែលបានអនុញាតិឲ្យក្រុមការងារ ចុះមកធ្វើការនៅស្នងការរដ្ឋាននគរបាលខេត្តបន្ទាយមានជ័យ ហើយនិងសុំកិច្ចសហការនៅស្នងការដ្ឋាននគរបាលខេត្តបន្ទាយមានជ័យ ៕
