សម្តេចធិបតី៖ រាជរដ្ឋាភិបាលបានដាក់ចេញគោលនយោបាយជាច្រើនដើម្បីគាំទ្រដល់វិស័យបរិស្ថាន
ភ្នំពេញ៖ ក្នុងឱកាសអញ្ជើញបិទសន្និបាតបូកសរុបការងារបរិស្ថានឆ្នាំ២០២៣ និងលើកទិសដៅការងារឆ្នាំ២០២៤ នៅទីស្តីការក្រសួងបរិស្ថាន នារសៀលថ្ងៃទី២១ ខែធ្នូ ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលបានដាក់ចេញគោលនយោបាយជាច្រើនដើម្បីគាំទ្រដល់វិស័យបរិស្ថាន ដោយបានបង្ហាញពីឆន្ទៈនយោបាយច្បាស់លាស់ និងចាត់ទុកការងារបរិស្ថានជាកិច្ចការសំខាន់។
សម្តេចធិបតី ហ៊ុន ម៉ាណែត បានគូសបញ្ជាក់ថា គោលនយោបាយផ្នែកបរិស្ថានដែលបានដាក់ចេញនាពេលបច្ចុប្បន្ន គឺដើម្បីបង្ការកុំឱ្យមនុស្សជំនាន់ក្រោយ រងផលប៉ះពាល់ដោយសារបញ្ហាបរិស្ថានមិនល្អ ពោលគឺយើងមានគោលដៅក្នុងការថែរក្សាបរិស្ថានសម្រាប់មនុស្សរាប់ជំនាន់តទៅមុខទៀត។
ទន្ទឹមនោះ សម្តេចធិបតីនាយករដ្ឋមន្ត្រី បានគូសបញ្ជាក់ថា រាល់គម្រោងអភិវឌ្ឍទាំងឡាយដែលប៉ះពាល់ដល់បរិស្ថាន យើងត្រូវតែសិក្សាឱ្យបានល្អិតល្អន់ និងថា បញ្ហាបរិស្ថាន មិនមានព្រំដែននោះទេ ដូច្នេះយើងទាំងអស់គ្នាត្រូវចូលរួមការពារ ៕
