ប្រមុខរាជរដ្ឋាភិបាល បញ្ជាឲ្យបន្សុទ្ធកងកម្លាំងប្រដាប់អាវុធ កុំឲ្យមានគ្រឿងញៀន

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាឲ្យរដ្ឋមន្ត្រីមហាផ្ទៃ និងរដ្ឋមន្ត្រីក្រសួងការពារជាតិ ត្រូវបន្សុទ្ធកងកម្លាំងប្រដាប់អាវុធទាំងអស់ កុំឱ្យមានពាក់ព័ន្ធបញ្ហាគ្រឿងញៀន ។

ក្នុងឱកាសអញ្ជើញ ​បិទ​សន្និ​បាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងបរិស្ថាន នាថ្ងៃទី២១​ ធ្នូនេះ សម្តេចធិបតីបញ្ជាក់ថា «ឥឡូវទិសដៅមួយដែលយើងត្រូវធ្វើ ហើយខ្ញុំចេញថ្ងៃនេះ ខ្ញុំបានជជែកជាមួយឯកឧត្តម ស សុខា និងឯកឧត្តម ទៀ សីហា ដែរ គឺត្រូវបន្សុទ្ធកម្លាំងរបស់យើង ត្រូវបោសសំអាតគ្រឿងញៀន ចេញពីកងកម្លាំងប្រដាប់អាវុធត្រូវតែធ្វើមុនគេ ព្រោះអ្នកអនុវត្តច្បាប់ ត្រូវតែស្អាតមុនគេ»។

សម្តេចថ្លែងថា ឯកឧត្ដមរដ្ឋមន្ត្រីក្រសួងមហាផ្ទៃ បានប្រកាសរួចហើយថា មន្ត្រីនគរបាលណា ដែលធ្វើតេស្តរកឃើញគ្រឿងញៀន គឺត្រូវតែបណ្តេញចេញពីក្របខណ្ឌ។ ដោយឡែកសម្រាប់ក្នុងក្របខណ្ឌកងទ័ព ក៏មានការអនុវត្តបណ្តេញទាហានណា ដែលរកឃើញសារធាតុផងដែរ ចាប់តាំងពីឆ្នាំ​ ២០១៩មកម្ល៉េះ។

សម្តេចគូសបញ្ជាក់ថា ចំពោះកងកម្លាំងប្រដាប់អាវុធណា ដែលជួញដូរគ្រឿងញៀន គឺត្រូវបណ្តេញចេញពីក្របខណ្ឌ និងប្រឈមចំពោះមុខច្បាប់៕