ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក ជួបពិភាក្សាការងារជាមួយគណៈប្រតិភូក្រសួងឧស្សាហកម្ម សិប្បកម្ម បច្ចេកវិទ្យា និងនវានុវត្តន៍
ភ្នំពេញ៖ នៅថ្ងៃទី២១ ខែធ្នូ ឆ្នាំ២០២៣ នាសាលប្រជុំរំដួល នៃទីស្តីការក្រសួងធនធានទឹក និងឧតុនិយម ឯកឧត្តម ចាន់ ស៊ីណាត រដ្ឋលេខាធិការបានទទួលជួបពិភាក្សាការងារជាមួយគណៈប្រតិភូក្រសួងឧស្សាហកម្ម សិប្បកម្ម បច្ចេកវិទ្យា និងនវានុវត្តន៍។
សូមជម្រាបថា កិច្ចប្រជុំពិភាក្សានេះមានការចូលរួមពី ឯកឧត្តមតំណាងជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ឯកឧត្តមរដ្ឋលេខាធិការតំណាងក្រសួងឧស្សាហកម្ម សិប្បកម្ម បច្ចេកវិទ្យា និងនវានុវត្តន៍ រួមជាមួយសហការីជាតិ និងអន្តរជាតិ និងមន្ត្រីនៃក្រសួងធនធានទឹក និងឧតុនិយមជាច្រើនរូប។
ឯកឧត្តមរដ្ឋលេខាធិការបានឱ្យដឹងថា ក្រោមការគាំទ្រយ៉ាងពេញទំហឹងពីក្រសួងសេដ្ឋកិច្ច និងហិរញ្ញវត្ថុ កិច្ចជំនួបពិភាក្សានេះមានគោលបំណងពង្រឹងកិច្ចសហប្រតិបត្តិការក្នុងការផលិតទឹកស្អាតសម្រាប់ផ្គត់ផ្គង់ជូនបងប្អូនប្រជាពលរដ្ឋប្រើប្រាស់ និងសម្រាប់ស្រោចស្រពដំណាំកសិកម្មនៅក្នុងតំបន់អាងទឹកទំនប់លើទំនប់ក្រោម អាងទឹកអូរទេ ក្នុងក្រុងសែនមនោរម្យ និងក្នុងស្រុកអូររាំង ខេត្តមណ្ឌលគិរី អាងទឹក៣០កញ្ញា ក្នុងស្រុកស្ទោង ខេត្តកំពង់ធំ និងបណ្តាអាងទឹកដទៃទៀតក្នុងក្របខណ្ឌទូទាំងប្រទេស ដើម្បីធានាយ៉ាងណាឱ្យបងប្អូនប្រជាពលរដ្ឋទទួលបានទឹកស្អាតប្រើប្រាស់គ្រប់គ្រាន់មានសុវត្ថិភាព និងមានសមធម៌។
ក្នុងជំនួបពិភាក្សានេះ ឯកឧត្តមរដ្ឋលេខាធិការបានបញ្ជាក់ប្រាប់ថា ក្រសួងធនធានទឹក និងឧតុនិយមនឹងបង្កើតគណៈកម្មាធិការអន្តរក្រសួងកម្រិតនយោបាយ ដឹកនាំដោយឯកឧត្តមរដ្ឋមន្ត្រី ថោ ជេដ្ឋា មានឈ្មោះថា គណៈកម្មាធិការដឹកនាំ ដោះស្រាយ និងតម្រង់ទិសលើកិច្ចការ និងនយោបាយទឹក ដោយអនុវត្តយ៉ាងសកម្មលើយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដែលបានកំណត់យកអាទិភាពទឹកជាជ្រុងមួយដ៏សំខាន់ក្នុងការជំរុញវិស័យសេដ្ឋកិច្ចនៃប្រទេសកម្ពុជា ដើម្បីសម្រេចចក្ខុវិស័យកម្ពុជាឆ្នាំ២០៣០៕
