សម្ដេចធិបតី៖ កំពង់ផែថ្មីជំហានទី១ មានប្រវែង ៣៥០ម៉ែត្រនេះ នឹងហើយរួចរាល់ នៅឆ្នាំ២០២៦
ភ្នំពេញ៖ ដើម្បីអបអរខួបអនុស្សាវរីយ៍លើកទី៧០ រវាងកម្ពុជា-ជប៉ុន សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានជំរុញឱ្យបើកការដ្ឋានកំពង់ផែថ្មីជំហានទី១ ដែលមានប្រវែង ៣៥០ម៉ែត្រ នេះ នៅក្នុងឆ្នាំ២០២៣ នេះតែម្ដង ដើម្បីឱ្យបានហើយរួចរាល់នៅត្រឹមឆ្នាំ២០២៦។
ក្នុងឱកាសអញ្ជើញបើកការដ្ឋានសាងសង់ចំណតផែកុងតឺន័រទឹកជ្រៅថ្មីជំហានទី១ ប្រវែង ៣៥០ម៉ែត្រ និងសម្ពោធបើកឱ្យប្រើប្រាស់ជាផ្លូវការគ្រឿងចក្រ លើកដាក់ចល័តនៅគែមផែ នៃកំពង់ផែស្វយ័តក្រុងព្រះសីហនុ ចំនួន ០២គ្រឿង ក្រោមឥណទានសម្បទាន និងជំនួយឥតសំណង ពីរដ្ឋាភិបាលជប៉ុន” នាថ្ងៃទី២២ ធ្នូនេះ សម្ដេចធិបតីបានរំលេចពីសមិទ្ធផលជាច្រើនដែលមិត្តជប៉ុនបានជួយដល់កម្ពុជា ដែលមានទាំងវិស័យធនធានមនុស្ស ហេដ្ឋារចនាសម្ព័ន្ធរូបវ័ន្ត និងហេដ្ឋារចនាសម្ព័ន្ធឌីជីថលជាដើម។ សមិទ្ធផលទាំងនោះរួមមានដូចជា កំពង់ផែស្វយ័តក្រុងព្រះសីហនុ ផ្លូវជាតិលេខ១ ផ្លូវជាតិលខ៥ ស្ពានគីហ្សូណា ស្ពានត្សឺបាសា ជាដើម ។ល។
