នាយឧត្តមសេនីយ៍ ឯក មនោសែន អញ្ជើញដឹកនាំគណៈប្រតិភូនៃបណ្ឌិត្យសភានគរបាល ចូលជួបសម្តែងការគួរសមជាមួយ ឯកឧត្តម ស៊ុយ ឌីម៉ង់ រដ្ឋលេខាធិការក្រសួងរ៉ែ និងថាមពល
ភ្នំពេញ៖ កាលពីរសៀលថ្ងៃទី២១ ខែធ្នូ ឆ្នាំ២០២៣ ឯកឧត្តម នាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញដឹកនាំគណៈប្រតិភូនៃបណ្ឌិត្យសភានគរបាលកម្ពុជា ចូលជួបសម្ដែងការគួរសមជាមួយ ឯកឧត្តម ស៊ុយ ឌីម៉ង់ រដ្ឋលេខាធិការក្រសួងរ៉ែ និងថាមពល តំណាងដ៏ខ្ពង់ខ្ពស់ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល នាទីស្តីការក្រសួងរ៉ែ និងថាមពល។
នៅក្នុងកិច្ចជំនួបសម្តែងការគួរសមនោះ ឯកឧត្តមនាយឧត្តមសេនីយ៍ បានគោរពអបអរសាទរ និងជូនពរចំពោះឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល ដែលទទួលបានការតែងតាំងជារដ្ឋមន្ត្រី និងឯកឧត្តម ស៊ុយ ឌីម៉ង់ ដែលទទួលបានការតែងតាំងជារដ្ឋលេខាធិការក្រសួងរ៉ែនិងថាមពល ក្នុងរដ្ឋាភិបាលនៃអាណត្តិនីតិកាលទី៧នៃរដ្ឋសភានេះ។
ក្នុងឱកាសនោះ ឯកឧត្តមនាយឧត្តមសេនីយ៍សាស្ត្រាចារ្យ ក៏បានលើកសំណើចំនួន២ ជូនឯកឧត្ដមរដ្ឋមន្ត្រី តាមរយៈឯកឧត្តម រដ្ឋលេខាធិការ គឺ៖
១-ស្នើសុំចងសម្ព័ន្ធភាពរវាងក្រសួងរ៉ែ និងថាមពល និងបណ្ឌិត្យសភានគរបាលកម្ពុជា។
២-គោរពស្នើសុំអញ្ជើញឯកឧត្តមរដ្ឋមន្ត្រី ធ្វើបាឋកថាចែករំលែកបទពិសោធលើការងារកំណែទម្រង់និងអភិវឌ្ឍន៍លើវិស័យរ៉ែ និងថាមពលនៅកម្ពុជា ជូនដល់ថ្នាក់ដឹកនាំ សាស្ត្រាចារ្យ គ្រូនគរបាល មន្ត្រីនគរបាល និស្សិត និងសិក្ខាកាមនគរបាល នៅបណ្ឌិត្យសភានគរបាលកម្ពុជា។
ជាចុងក្រោយ ឯកឧត្តម នាយឧត្តមសេនីយ៍សាស្ត្រាចារ្យ ប្រធានបណ្ឌិត្យសភានគរបាលកម្ពុជា ក៏បានគោរពជូនបាច់ផ្កាអនុស្សាវរីយ៍ ជូនចំពោះឯកឧត្តមរដ្ឋលេខាធិការក្រសួងរ៉ែ និងថាមពល និងថតរូបជុំគ្នាជាអនុស្សាវរីយ៍។ កិច្ចពិភាក្សា បានប្រព្រឹត្តទៅក្រោមបរិយាកាសរីករាយនិងប្រកបដោយលទ្ធផលជាទីគាប់ប្រសើរ ៕
