ឯកឧត្តមរដ្ឋលេខាធិការ ចាន់ ស៊ីណាត ដឹកនាំគណៈប្រតិភូក្រសួងសេដ្ឋកិច្ច និងហិរញ្ញវត្ថុ ចុះពិនិត្យវឌ្ឍនភាពគម្រោងក្នុងភូមិសាស្ត្រខេត្តមណ្ឌលគិរី

ភ្នំពេញ៖ នាថ្ងៃសុក្រ ១០កើត ខែមិគសិរ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២២ ខែធ្នូ ឆ្នាំ២០២៣ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយមបានដឹកនាំគណៈប្រតិភូតំណាងជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ដែលដឹកនាំដោយឯកឧត្តម ប៉ែន ធីរុង្គ អនុរដ្ឋលេខាធិការ ចុះពិនិត្យការដ្ឋានទំនប់អាងអូរតេ និងទំនប់អាងទឹកទំនប់លើទំនប់ក្រោម ក្នុងភូមិសាស្ត្រស្រុកអូររាំង និងក្រុងសែនមនោរម្យ ខេត្តមណ្ឌលគិរី។

ក្នុងឱកាសចុះពិនិត្យការងារនេះ គណៈប្រតិភូក្រសួងសេដ្ឋកិច្ច និងហិរញ្ញវត្ថុបានថ្លែងនូវការកោតសរសើរ និងវាយតម្លៃខ្ពស់ចំពោះក្រសួងធនធានទឹក និងឧតុនិយម ដែលបានវិនិយោគ ដោយប្រើប្រាស់ធនធានជាតិ និងដៃគូអភិវឌ្ឍន៍ចំទិសដៅ ស្របតាមយុទ្ធសាស្រ្តបញ្ចកោណដំណាក់កាលទី១ នៃរាជរដ្ឋាភិបាលនីតិកាលទី៧។

ជាមួយគ្នានេះដែរ គណៈប្រតិភូក៏បានលើកឡើងពីការអនុវត្តបានយ៉ាងត្រឹមត្រូវឈរលើស្មារតីប្រកួតប្រជែងជាមួយនឹងបណ្តាប្រទេសនៅក្នុងតំបន់ និងនៅក្នុងពិភពលោកលើនយោបាយទឹក បញ្ជាទឹក គ្រប់គ្រងទឹក និងប្រើប្រាស់ទឹកប្រកបដោយប្រសិទ្ធភាពខ្ពស់ ក្នុងពេលដែលអាកាសធាតុមានការប្រែប្រួលខ្លាំង ហើយតំបន់ភូមិភាគឦសានមួយនេះតែងតែទទួលរងនូវបាតុភូតធម្មជាតិគ្រប់ប្រភេទ។

ឯកឧត្តមរដ្ឋលេខាធិការ បានគូសបញ្ជាក់ថា ទំនប់អាងទឹកក្នុងតំបន់ប៉ូលសេដ្ឋកិច្ចទី៥នៅខេត្តភូមិភាគឦសាននៃប្រទេសកម្ពុជា ដែលក្រសួងធនធានទឹក និងឧតុនិយមកសាង មិនមែនសម្រាប់បម្រើវិស័យឯកជនតែមួយទេ គឺសម្រាប់បម្រើឱ្យគ្រប់វិស័យទាំងអស់ក្នុងតំបន់ប៉ូលសេដ្ឋកិច្ចទី៥ ៕