អ្នកស្មក្រ័ចិត្តខ្មែរនិងបរទេស និងសិល្បៈករចំនួន ៤៥នាក់ ចូលរួមសួរសុខទុក្ខ និងនាំយកអំណោយនិងថវិកាជូនព្រឹទ្ធាចារ្យកោសល្យវោហារ គង់ ណៃ នៅខេត្តកំពត
ភ្នំពេញ៖ ដើម្បីចូលរួមចែករំលែក និងជួយសម្រួលក្នុងការរស់នៅប្រចាំថ្ងៃរបស់ព្រឹទ្ធាចារ្យកោសល្យវោហារ គង់ ណៃ ឯកឧត្តម ឈួរ សុបញ្ញា រដ្ឋលេខាធិការក្រសួងមុខងារសាធារណៈ បានដឹកនាំអ្នកស្មក្រ័ចិត្តខ្មែរនិងបរទេស និងសិល្បៈករចំនួន ៤៥នាក់ នៃសមាគមចាប៉ី អមត: ចូលរួមសួរសុខទុក្ខ និងនាំយកអំណោយនិងថវិកាជូនព្រឹទ្ធាចារ្យកោសល្យវោហារ គង់ ណៃ នៅខេត្តកំពត នារសៀលថ្ងៃទី២៣ ខែធ្នូ ឆ្នាំ២០២៣នេះ ក្រោមយុទ្ធនាការ ដឹងគុណព្រឹទ្ធាចារ្យ ចាប៉ីដងវែង។
សូមបញ្ជាក់ថា លោកព្រឹទ្ធាចារ្យ កោសល្យវោហារ គង់ ណៃ ទទួល បានពានរង្វាន់សិល្ប:វប្បធម៌ហ្វូគុអូកា នៃប្រទេសជប៉ុន ឆ្នាំ២០១៧ និងទទួលបានគោរម្យងារវិរៈសិល្បករមរតកមនុស្សរស់ ពីសម្តេចតេជោ ក្រោយពេលដែលចាបុីដងវែងកម្ពុជាត្រូវបានចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិ។ សព្វថ្ងៃលោកព្រឹទ្ធាចារ្យ មាននអាយុ ៧៨ឆ្នាំ រស់នៅភូមិដូង ឃុំស្វាយទងខាងជើង ស្រុកកំពង់ត្រាច ខេត្តកំពត។ លោកតាមិនអាចប្រកបរបរដេញចាប៉ីដងវែងដើម្បីរកប្រាក់ ចំណូលមកចិញ្ចឹមជីវភាពប្រចាំថ្ងៃដូចមុនទៀតបានឡើយ ដោយសារកត្តាសុខភាពរបស់គាត់កាន់តែទ្រុឌទ្រោម និងពិការភ្នែកមិនអាចមើលអ្វីឃើញ ពិបាកក្នុងការធ្វើដំណើរ។ បច្ចុប្បន្នមានលោកយាយជាប្រពន្ធជាអ្នកមើលថែទាំ និងរៀបចំបាយទឹកជូនលោកតាជាប្រចាំថ្ងៃ។ អំណោយដែលត្រូវផ្តល់ជូនរួមមាន៖ គ្រឿងឧបភោគ-បរិភោគ និងសម្ភារប្រើប្រាស់ និងថវិកាចំនួន ១,១៤០,០០០រៀល ជាថវិកាឧបត្ថម្ភ។
លោកតា គង់ ណៃ បានសម្តែងសេចក្តីត្រេកអរជាខ្លាំងជាពន្លឹក និងថ្លែងអំណរគុណចំពោះសម្តេចប្រមុខរាជរដ្ឋាភិបាល សប្បុរសជន និងសិស្សគណ ដែលតែងតែយកចិត្យទុក្ខដាក់លោកតាគ្រប់ពេល ៕
