ប្រមុខរាជរដ្ឋាភិបាលកម្ពុជា៖ បើគ្មានទិន្នន័យ ហាក់ស្ថិតនៅចំណុចមួយវង្វេងវង្វាន់ មិនអាចដឹងថា នៅជុំវិញយើងមានស្ថានភាពបែបណា

ភ្នំពេញ៖ ក្នុងឱកាសអញ្ជើញប្រកាសផ្សព្វផ្សាយរបាយការណ៍ថ្នាក់ជាតិ ស្តីពីលទ្ធផលចុងក្រោយ នៃជំរឿនសេដ្ឋកិច្ចកម្ពុជាឆ្នាំ២០២២ នាថ្ងៃទី២៦ ធ្នូនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងឲ្យដឹងថា បើគ្មានទិន្នន័យហាក់ស្ថិត នៅចំណុចមួយវង្វេងវង្វាន់ មិនអាចដឹងថា នៅជុំវិញយើងមានស្ថានភាពបែបណា និងមិនអាចព្យាករណ៍ទៅមុខមានអ្វី ហើយដើរដល់ចំណុចណា និងទៅណាទៀតនោះទេ។

សម្តេចធិបតី ហ៊ុន ម៉ាណែត មានប្រសាសន៍ថា សារៈសំខាន់នៃជំរឿនសេដ្ឋកិច្ច ត្រូវការទិន្នន័យ ប្រៀបដូចផែនទីមួយ ជាត្រីវិស័យ ហើយផែនទីគឺបង្ហាញឱ្យឃើញពីភូមិសាស្ត្រ ដែលភូមិសាស្ត្រនេះ មិនសំដៅទៅលើដីទេ អាចសំដៅទៅលើភូមិសាស្ត្រនយោបាយ សេដ្ឋកិច្ច ធុរៈកិច្ច បានឱ្យដឹងពីស្ថានភាពជុំវិញថាមានលក្ខណៈយ៉ាងណាខ្លះ។

សម្តេចធិបតី ថ្លែងថា សូម្បីតែការធ្វើធុរៈកិច្ចត្រូវដឹងពីចំណងចំណូលចិត្តអតិថិជនចង់បានអ្វីដែរ មុននឹងដាក់វិនិយោគ នេះហើយជាការវាស់ស្ទង់។ រីឯត្រីវិស័យ បានឱ្យដឹងថា នៅចំណុចណាលើត្រីវិស័យ ក្នុងផែនទីភូមិសាស្ត្រនេះ តើប៉ុន្មានគីឡូដល់ទឹក ប៉ុន្មានគីឡូដល់ជ្រោះ? ហើយគិតដើរទៅផ្លូវណាផ្សេងទៀត នេះជាកិច្ចការងារសំខាន់ណាស់។

សម្តេចធិបតីបញ្ជាក់ថា ការប្រើប្រាស់ទិន្នន័យនៅលើកាលវិភាគនេះ គឺប្រើនៅលើពិភពលោក អាចនិយាយបានថា បើគ្មានទិន្នន័យហាក់ស្ថិតនៅចំណុចមួយវង្វេងវង្វាន់ មិនអាចដឹងថា នៅជុំវិញយើងមានស្ថានភាពបែបណា និងមិនអាចព្យាករណ៍ទៅមុខមានអ្វី ហើយដើរដល់ចំណុចណា និងទៅណាទៀតនោះទេ។ ដូចនេះ ការគ្រប់គ្រងទិន្នន័យគឺសំខាន់ណាស់ ដែលពិភពលោក បានកំពុងប្រើប្រព័ន្ធគ្រប់គ្រងទិន្នន័យទំនើប មានទាំងក្នុងទូរស័ព្ទដៃផងដែរ៕