ឯកឧត្ដម ស្វាយ សំអ៊ាង៖ ឆ្នាំ២០២៣ រដ្ឋបាលខេត្តស្ទឹងត្រែង អនុវត្តគម្រោងវិនិយោគអភិវឌ្ឍន៍ខេត្តប្រចាំឆ្នាំបាន ១៦គម្រោង ដែលមានទឹកប្រាក់ជាង ៨ពាន់លានរៀល
ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង បានថ្លែងឲ្យដឹងថា ឆ្នាំ២០២៣នេះ រដ្ឋបាលខេត្តស្ទឹងត្រែង បានអនុវត្តគម្រោងវិនិយោគ អភិវឌ្ឍន៍ខេត្តប្រចាំឆ្នាំសរុបចំនួន ១៦គម្រោង ដែលមានទឹកប្រាក់ចំនួន ៨.៦៣៤,៨០លានរៀល ។
ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ២០២៣ និងទិសដៅការងារឆ្នាំ២០២៤ របស់រដ្ឋបាលខេត្តស្ទឹងត្រែង នាព្រឹកថ្ងៃទី២៦ ធ្នូនេះ ឯកឧត្ដម ស្វាយ សំអ៊ាង បានមានប្រសាសន៍ថា «សម្រាប់ការងារផែនការ និងការគាំទ្រមូលដ្ឋាន ឆ្នាំ២០២៣នេះ រដ្ឋបាលខេត្តបានអនុវត្តគម្រោងវិនិយោគអភិវឌ្ឍន៍ខេត្តប្រចាំឆ្នាំសរុបចំនួន ១៦គម្រោង ដែលមានទឹកប្រាក់ចំនួន ៨.៦៣៤,៨០លានរៀល ក្នុងនោះមាន៖ ផ្នែកសេដ្ឋកិច្ច ២គម្រោង ដែល មានតម្លៃ ៧.៦២៧លានរៀល ផ្នែកសង្គមកិច្ច ៧គម្រោង ដែលមានតម្លៃ ២៣១,៨០លានរៀល ផ្នែកគ្រប់គ្រង ដីធ្លី ធនធានធម្មជាតិ បរិស្ថាន ការប្រែប្រួលអាកាសធាតុ និងគ្រោះមហន្តរាយ ១គម្រោង ស្មើនឹង ៤៩,៩០លានរៀល និងផ្នែករដ្ឋបាល និងសន្តិសុខ សណ្តាប់ធ្នាប់សាធារណៈចំនួន ៦គម្រោង ស្មើនឹង ៧២៥,៨០លានរៀល» ។
ឯកឧត្ដមអភិបាលខេត្តស្ទឹងត្រែង បន្ថែមថា ចំពោះការអនុវត្តផែនការសកម្មភាព និងថវិកាផអ៣ ដែលបានគ្រោងថវិកាសរុប ៨៣.៩៤០.០០០ រៀល បានអនុវត្តចំណាយសរុបចំនួន ៧៩.១៨៧.០០០រៀល ស្មើនឹង៩៤,៣៤% និងមានសមតុល្យចំនួន ៤.៧៥៣.០០០រៀល។
ឯកឧត្ដម ស្វាយ សំអ៊ាង គូសបញ្ជាក់ថា ជាមួយគ្នានោះរដ្ឋបាលខេត្ត ក៏បានសម្របសម្រួល និងផ្តល់ការគាំទ្របច្ចេកទេសក្នុងការរៀបចំផែនការអភិវឌ្ឍន៍ប្រាំឆ្នាំ និងកម្មវិធីវិនិ យោគបីឆ្នាំរំកិល ព្រមទាំងសិក្សាលទ្ធភាពគម្រោងមូលនិធិអភិវឌ្ឍន៍ក្រុង ស្រុក និងឃុំ សង្កាត់ ក្នុងនោះ គម្រោងអភិវឌ្ឍន៍ក្រុង ស្រុកទាំង៦ រួមមាន៖ ផ្លូវបេតុង ៥ខ្សែ ប្រវែង ១.៣១០គីឡូម៉ែត្រ ផ្លូវក្រួសក្រហម ៦ខ្សែ ប្រវែង ១៤,៦៩គីឡូម៉ែត្រ ផ្លូវដីស ៤ខ្សែ ប្រវែង ៥,៤គីឡូម៉ែត្រ លូកាត់ផ្លូវចំនួន ១៦កន្លែង លូរំដោះទឹក ស្អុយប្រវែង ៤០០ម៉ែត្រ និងដាក់រេហ្គាចំនួន ២០កន្លែង ក្នុងទំហំទឹកប្រាក់ ៣.២០៧លានរៀល។ ដោយឡែក គម្រោងអភិវឌ្ឍន៍ឃុំ សង្កាត់ រួមមាន៖ ផ្លូវដីស ៤ខ្សែ ប្រវែង ៤០,៧៩គីឡូម៉ែត្រ ផ្លូវបេតុង ១២ខ្សែ ប្រវែង ១២.២៩គីឡូម៉ែត្រ ផ្លូវក្រួសក្រហម ២១ខ្សែ ប្រវែង ១៥៦,៧៩គីឡូម៉ែត្រ លូកាត់ផ្លូវចំនួន ១២៣កន្លែង និងការសាងសង់អន្តេវាសិកដ្ឋានគ្រូ១កន្លែង មានបន្ទប់ទឹក២ ដោយប្រើប្រាស់ថវិកាសរុប ១១.៧៤២លានរៀល ៕
