សម្តេចធិបតី៖ ដរាបណាសន្តិភាពនៅតែធានាបាន ប្រទេសជាតិនឹងកាន់តែអភិវឌ្ឍរីកចម្រើន នេះហើយជាអ្វីដែលយើងជាខ្មែរត្រូវមានមោកភាព

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងបញ្ជាក់ថា ដរាបណាសន្តិភាពនៅតែធានាបាន ប្រទេសជាតិនឹងកាន់តែអភិវឌ្ឍរីកចម្រើនតទៅទៀត នេះហើយជាអ្វីដែលយើងជាខ្មែរត្រូវមានមោទភាពទាំងអស់គ្នា ។

ក្នុងឱកាសអញ្ជើញសម្ពោធដាក់ឱ្យប្រើប្រាស់ប្រព័ន្ធបង្ហូរទឹកកខ្វក់ក្នុងរាជធានីភ្នំពេញនៅព្រឹកថ្ងៃទី២៧ ខែធ្នូ សម្តេចធិបតី ហ៊ុន ម៉ាណែត បញ្ជាក់ថា «មានអ្នកខ្លះគេចោទប្រកាន់ថា ហ៊ុន ម៉ាណែត, សម្តេចតេជោ ថ្នាក់ដឹកនាំរដ្ឋាភិបាល គណបក្សប្រជាជនកម្ពុជា ទៅណានិយាយតែរឿងប្រវត្តិសាស្ត្រ និងយាយតែរឿងដដែល, តែនិយាយនេះដើម្បីឱ្យចងចាំពីប្រវត្តិសាស្ត្រ និយាយឲ្យដឹងថាយើងដើរដល់ណា ដើម្បីយើងត្រូវមានភាពជឿជាក់ និងមានមោទនភាពថាខ្មែរយើងបានរួមគ្នាដើរដល់ចំណុចនេះ»។

សម្តេចធិបតី បន្ថែមថា នៅពេលយើងនិយាយពីសមិទ្ធផល យើងក៏ត្រូវនិយាយផងដែរនូវការការពារឱ្យបានយូរអង្វែង ហើយអ្វីដែលសំខាន់បំផុតត្រូវការពារឱ្យបាន គឺបរិស្ថានដែលអំណោយផលឱ្យប្រជាជនបានរស់រានមានជីវិត និងឈប់កាប់ចាក់គ្នា និងរួមគ្នាកសាងប្រទេស តាមរយៈការថែរក្សាសុខសន្តិភាព និងឯកភាពជាតិរបស់យើង ដែលរកបានដោយការលំបាកនេះ៕