ឯកឧត្តម ផៃ ប៊ុនឈឿន កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ត្រីទាំងអស់ក្នុងខេត្តស្ទឹងត្រែង ដែលបំពេញតួនាទីភារកិច្ចបានយ៉ាងល្អរហូតសម្រេចបានសមិទ្ធផលជាច្រើនជូនប្រជាពលរដ្ឋ

ភ្នំពេញ៖ ឯកឧត្តម ផៃ ប៊ុនឈឿន រដ្ឋលេខាធិការប្រចាំការ ក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្ទឹងត្រែង បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ ឯកឧត្តម លោកជំទាវ លោកស្រី អស់លោក ដែលជាថ្នាក់ដឹកនាំនៃរដ្ឋបាលគ្រប់លំដាប់ថ្នាក់ និងក្រុមការងាររាជរដ្ឋាភិបាលចុះមូលដ្ឋាន មន្ត្រីរាជការ កងកម្លាំងមានសមត្ថកិច្ចទាំងអស់ដែលបានយកអស់កម្លាំង ប្រាជ្ញា ស្មារតី សហការ សាមគ្គីគ្នាបានយ៉ាងល្អនៅក្នុងការបំពេញតួនាទី ភារកិច្ចប្រកបដោយការទទួលខុសត្រូវ រហូតឈាន ទៅសម្រេចបាននូវសមិទ្ធផលនានាជាច្រើនជូនប្រជាពលរដ្ឋក្នុងទូទាំងខេត្ត។

ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តស្ទឹងត្រែង នារសៀលថ្ងៃទី២៧ ខែធ្នូ ឆ្នាំ២០២៣ ឯកឧត្តម ផៃ ប៊ុនឈឿន បានមានប្រសាសន៍ថា រយៈពេលពេញមួយឆ្នាំ២០២៣ សភាពការណ៍សន្តិសុខ សេដ្ឋកិច្ចនៅក្នុងតំបន់ និងសកល- លោក នៅតែបន្តវិវត្តន៍ប្រែប្រួល ស្មុគស្មាញ និងពិបាកប៉ាន់ស្មាន ដោយបង្កើតឱ្យមានបញ្ហាប្រឈមជាច្រើនដូចជា ការប្រកួតប្រជែងដណ្ដើមភូមិសាស្ត្រនយោបាយ វិបត្តិសេដ្ឋកិច្ចដោយសារសង្គ្រាម រវាងរុស្ស៊ី-អ៊ុយក្រែន វិវាទនៃឧបទ្វីបកូរ៉េ កោះតៃវ៉ាន់ សមុទ្រចិនខាងត្បូង វិបត្តិនយោបាយនៅតំបន់ អាហ្វ្រិក អាស៊ីបូព៌ា ប្រទេសមួយចំនួននៅតំបន់អាស៊ាន ជាពិសេសថ្មីៗនេះសង្គ្រាមរវាងអ៊ីស្រាអ៊ែល និងហាម៉ាស ប៉ាឡេស្ទីន ព្រមទាំងការបន្តកើតឡើងនូវអំពើភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ឧក្រិដ្ឋកម្មបច្ចេកវិទ្យាព័ត៌មានទំនើប រួមទាំងជំងឺរាតត្បាត គ្រោះធម្មជាតិ និងការប្រែប្រួលអាកាសធាតុ។

ឯកឧត្ដមបញ្ជាក់ថា ទោះបីមានផលប៉ះពាល់បណ្តាលមកពីបញ្ហាប្រឈមយ៉ាងស្មុគស្មាញខាងលើ ក្រសួងមហាផ្ទៃ និង ក្រសួងស្ថាប័នពាក់ព័ន្ធនានា រួមទាំងរដ្ឋបាលគ្រប់ថ្នាក់ និងកងកម្លាំងនគរបាលជាតិបានរួមសហការ ជាមួយនឹងអាជ្ញាធរ និងផ្នែកពាក់ព័ន្ធទាំងអស់បានខិតខំសម្រេចដោយជោគជ័យនូវបេសកកម្មរបស់ ខ្លួនជាមួយនឹងសមិទ្ធផល និងស្នាដៃជាច្រើនក្នុងការថែរក្សាសុខសន្តិភាព ស្ថិរភាពនយោបាយ ការ ការពារបូរណភាពទឹកដី អធិបតេយ្យជាតិ ការថែរក្សាការពារសន្តិសុខ សណ្តាប់ធ្នាប់សាធារណៈ និង សុវត្ថិភាពសង្គមបានយ៉ាងល្អប្រសើរដែលធានាដល់ការរស់នៅដ៏សុខសាន្តរបស់ប្រជាជន ជាពិសេសការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសម្រាប់ការបោះឆ្នោតតាម អាណត្តិនីមួយៗ សុវត្ថិភាពសម្រាប់កិច្ចប្រជុំធំៗ និងព្រឹត្តិការណ៍អន្តរជាតិនានាដែលបានរៀបចំនៅ ក្នុងប្រទេសរបស់យើង។

ឯកឧត្ដមបម្ថែមថា ទន្ទឹមនេះ ការងារកំណែទម្រង់វិមជ្ឈការ និងវិសហមជ្ឈការក៏មានវឌ្ឍនភាព យ៉ាងល្អប្រសើរ និងសម្រេចបានសមិទ្ធផលនានាជាច្រើន ក្នុងនោះរចនាសម្ព័ន្ធ ប្រព័ន្ធគ្រប់គ្រង និង នីតិវិធីបំពេញការងាររបស់រដ្ឋបាលថ្នាក់ក្រោមជាតិត្រូវបានរៀបចំ និងត្រូវបានពង្រឹងទាំងក្នុងក្របខ័ណ្ឌ ស្ថាប័ន ការលើកកម្ពស់សមត្ថភាពធនធានមនុស្ស និងប្រសិទ្ធភាពនៃការអនុវត្តការងារដើម្បីធានាដល់ ការលើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈ និងការអភិវឌ្ឍមូលដ្ឋាន ឆ្លើយតបទៅនឹងតម្រូវការ និងដោះស្រាយបញ្ហាប្រឈមនានារបស់ប្រជាពលរដ្ឋបានទាន់ពេលវេលា និងចំគោលដៅ។

ឯកឧត្ដមប្រធានក្រុមការងារ បានឱ្យដឹងទៀតថា សមិទ្ធផលដែលក្រសួងស្ថាប័ន និងរដ្ឋបាលគ្រប់ថ្នាក់សម្រេចបានកន្លងមកនេះ ក៏បានឆ្លុះ បញ្ចាំងពីកិច្ចខិតខំប្រឹងប្រែងក្នុងការចូលរួមអនុវត្តយ៉ាងសកម្មនូវកម្មវិធីនយោបាយ និងយុទ្ធសាស្ត្រ ចតុកោណដំណាក់កាលទី៤របស់រាជរដ្ឋាភិបាលសម្រាប់នីតិកាលទី៦ នៃរដ្ឋសភា និងការចាប់ផ្តើម អនុវត្តនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលសម្រាប់ នីតិកាលទី៧ នៃរដ្ឋសភា ដើម្បីជំរុញល្បឿននៃការអភិវឌ្ឍប្រទេសជាតិឱ្យឈានឆ្ពោះទៅសម្រេចបាន ចក្ខុវិស័យ កម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូល ខ្ពស់នៅឆ្នាំ២០៥០៕