សម្តេចធិបតី៖ ពិធីអបអរខួប នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តដោយជោគជ័យនយោបាយឈ្នះ-ឈ្នះ ពិតជាមានអត្ថន័យជាប្រវត្តិសាស្ត្រ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ពិធីអបអរសាទរខួប លើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តដោយ ជោគជ័យនូវនយោបាយឈ្នះ-ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ដែលជាស្ថាបនិក នៃសុខសន្តិភាព ពិតជាមានអត្ថន័យជាប្រវត្តិសាស្ត្រ ។

ក្នុងពិធីអបអរសាទរខួប ២៥ឆ្នាំនៃការបញ្ចប់សង្គ្រាមស៊ីវិលនៅ​កម្ពុជា និងការអនុវត្តប្រកបដោយជោគជ័យនយោបាយឈ្នះ-ឈ្នះ និងខួប៥ឆ្នាំ​នៃការកសាងវិមានឈ្នះ-ឈ្នះនៅថ្ងៃទី២៩ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត បញ្ជាក់ថា «ថ្ងៃនេះ ទូលបង្គំព្រះករុណាខ្ញុំមានក្តីសោមនស្សរីករាយ ដែលបានអញ្ជើញជាអធិបតី អបអរសាទរខួប លើកទី២៥ នៃការបញ្ចប់សង្គ្រាមស៉ីវិលនៅកម្ពុជា និងការអនុវត្តដោយ ជោគជ័យនូវនយោបាយឈ្នះ-ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ដែលជាស្ថាបនិក នៃសុខសន្តិភាព។ ពិធីនេះ ពិតជាមានអត្ថន័យជាប្រវត្តិសាស្ត្រ ដែលរំលឹកនូវការបញ្ចប់សង្គ្រាម ស៉ីវិលរ៉ាំរ៉ៃនៅកម្ពុជា និងការទទួលបាននូវសុខសន្តិភាពពេញលេញទូទាំងផ្ទៃប្រទេស ដែលយើងមិនធ្លាប់មានជាង ៥០០ឆ្នាំ ពិធីដែលមានអត្ថន័យជាប្រវត្តិសាស្ត្រនេះត្រូវបានរៀបចំឡើងស្របពេលពិធីឆ្លងឆ្នាំសកល ឆ្នាំ២០២៣ ចូល២០២៤ ក្រោមបរិយាកាសរីករាយ និងស្មារតីជាតិខ្ពស់ ដែលទូលបង្គំព្រះករុណាខ្ញុំ យកឱកាសនេះ ចូលរួមជាមួយបងប្អូនប្រជាពលរដ្ឋគ្រប់រូបនៅទូទាំងប្រទេស ដែលបានចូលរួមអបអរសាទរ នៅក្នុងពិធីដ៏មហោឡារឹកនេះ នៅក្នុងបរិវេណសំណង់ប្រវត្តិសាស្ត្រ ដែលជានិមិត្តរូបនៃសុខសន្តិភាព ឯកភាពទឹកដី និងភាពសុខដុមរមនារបស់ប្រជាពលរដ្ឋខ្មែរ ទាំងមូល ដែលបានកើតចេញពីនយោបាយឈ្នះ-ឈ្នះ របស់សម្តេចតេជោ ហ៊ុន សែន ទុកជាកេរតំណែលប្រវត្តិសាស្ត្រ មិនអាចកាត់ថ្លៃបានសម្រាប់អ្នកជំនាន់ក្រោយ» ៕