អភិបាលខេត្តកណ្តាល ណែនាំដល់អាជ្ញាធរពាក់ព័ន្ធត្រូវបន្តពង្រឹងការអនុវត្តការបង្ការទប់ស្កាត់ការជួញដូរ និងប្រើប្រាស់គ្រឿងញៀនឲ្យមានប្រសិទ្ធភាព

ភ្នំពេញ៖ នៅរសៀលថ្ងៃទី៣ ខែមករា ឆ្នាំ២០២៤ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្តាល បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំខែធ្នូ ឆ្នាំ២០២៣និងលើកទិសដៅការងារខែមករា ឆ្នាំ២០២៤ របស់រដ្ឋបាលខេត្តកណ្តាល។

មានប្រសាសន៍បើកកិច្ចប្រជុំនាឱកាសនោះ ឯកឧត្ដម គង់ សោភ័ណ្ឌអភិបាលខេត្ត បានកោតសរសើរចំពោះលោក លោកស្រីជាថ្នាក់ដឹកនាំ កងកម្លាំងប្រដាប់អាវុធ មន្ត្រីរាជការក្នុងខេត្តកណ្តាលទាំងអស់ដែលបានសហការអនុវត្តតួនាទីភារកិច្ចរបស់ខ្លួនក្នុងការអនុវត្តការងារកន្លងមកសម្រេចបានលទ្ធផលជាទីគាប់ប្រសើរ និងរក្សាការពារសន្តិសុខ សុវត្ថិភាព សណ្ដាប់ធ្នាប់សាធារណៈក្នុងខេត្តបានល្អ។

ឯកឧត្តមអភិបាលខេត្ត បានជំរុញដល់មន្ទីរប្រៃនីយ៍ និងទូរគមនាគមន៍ខេត្តត្រូវពង្រឹងលើការងារដំឡើងអង់តែនទូរស័ព្ទក្នុងខេត្តកណ្តាល ដើម្បីអោយខេត្តកណ្តាលទទួលបានសេវាពេញលេញគ្រប់ទីកន្លែងស្របតាមម័យកាលDigital ដើម្បីបង្កើនប្រសិទ្ធភាពការងារអោយមានភាពងាយស្រួល និងទាន់ពេលវេលា។

ពាក់ព័ន្ធនឹងកិច្ចការសន្តិសុខសង្គម ឯកឧត្តម គង់ សោភ័ណ្ឌ បានមានប្រសាសន៍ ក្រើនរំលឹកដល់អាជ្ញាធរស្រុក-ក្រុង កងកម្លាំងគ្រប់ប្រភេទត្រូវអនុវត្តការងារភូមិ ឃុំ សង្កាត់ មានសុវត្ថិភាព និងបន្តពង្រឹងការចុះបង្រ្កាបបទល្មើសផ្សេងៗ និងអនុវត្តច្បាប់ចរាចរផ្លូវគោកឱ្យបានម៉ឺងម៉ាត់ ដើម្បីធានាសន្តិសុខសណ្ដាប់ធ្នាប់ និងសុវត្ថិភាពជូនប្រជាពលរដ្ឋ។

ឯកឧត្តមអភិបាលខេត្ត បានផ្តាំផ្ញើដល់អាជ្ញាធរពាក់ព័ន្ធត្រូវបន្តពង្រឹងការអនុវត្តការបង្ការទប់ស្កាត់ការជួញដូរ និងប្រើប្រាស់គ្រឿងញៀនឲ្យមានប្រសិទ្ធភាព ក្នុងនោះមន្ទីរអប់រំត្រូវមានវិធានការណ៍អប់រំផ្សព្វផ្សាយនៅតាមសាលារៀន និងសិស្សានុសិស្ស អោយយល់ច្បាស់ពីបញ្ហាគ្រឿងញៀន ព្រោះថាគ្រឿងញៀនគឺជះឥទ្ធិពលអាក្រក់ដល់មូលដ្ឋាន សហគមន៍ និងសង្គមជាតិយើងទាំងមូល។ អាជ្ញាធរក្រុង-ស្រុក ពាក់ព័ន្ធពិសេសមន្ទីរធនធានទឹក និងឧតុនិយមខេត្ត ត្រូវណែនាំ និងផ្សព្វផ្សាយដល់ប្រជាពលរដ្ឋដែលរស់នៅតាមបណ្តោយមាត់ព្រែកអោយយល់ច្បាស់ស្តីពីការអភិវឌ្ឍន៍ និងស្តារព្រែកដើម្បីរំដោះទឹកកុំអោយមានការជន់លិចក្នុងភូមិសាស្ត្ររបស់ខ្លួន។មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ត្រូវពន្លឿនក្នុងការងារចុះវាស់វែងដីធ្លីជូនដល់បងប្អូនប្រជាពលរដ្ឋអោយបានឆាប់រហ័ស ពិសេសការចុះបញ្ជីដីរបស់រដ្ឋអោយមានប្រសិទ្ធភាព ៕