លោកជំទាវកិត្តិបណ្ឌិត អុឹង កន្ថាផាវី អញ្ជើញជាអធិបតីក្នុងកិច្ចប្រជុំពិគ្រោះយោបល់ផ្ទៃក្នុង លើសេចក្តីព្រាងផែនការយុទ្ធសាស្រ្ត៥ឆ្នាំ របស់ក្រសួងកិច្ចការនារី (២០២៤-២០២៨)
ភ្នំពេញ៖ នាថ្ងៃសុក្រ ៩រោច ខែមិគសិរ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី០៥ ខែមករា ឆ្នាំ២០២៤ លោកជំទាវកិត្តិបណ្ឌិត អុឹង កន្ថាផាវី រដ្ឋមន្រ្តីក្រសួងកិច្ចការនារី បានអញ្ជើញជាអធិបតីភាពដ៍ខ្ពង់ខ្ពស់ក្នុងកិច្ចប្រជុំពិគ្រោះយោបល់ផ្ទៃក្នុងលើសេចក្តីព្រាងផែនការយុទ្ធសាស្រ្ត ៥ឆ្នាំ របស់ក្រសួងកិច្ចការនារី(២០២៤-២០២៨) នៅទីស្តីការក្រសួងកិច្ចការនារី។
កិច្ចប្រជុំពិគ្រោះយោបល់នេះ រៀបចំឡើងក្នុងគោលបំណង ដើម្បីចែករំលែកនូវសមិទ្ធផលសំខាន់ៗដែលក្រសួង និងមន្ទីរកិច្ចការនារីរាជធានី ខេត្ត ដែលបានអនុវត្តន៍ក្នុងរយៈពេល៥ឆ្នាំកន្លងមក ឆ្នាំ២០១៩-២០២៣ និងប្រមូលធាតុចូលលើសេចក្តីព្រាងយុទ្ធសាស្រ្តអាទិភាព នៃផែនការយុទ្ធសាស្រ្តនារីរតនៈទី៦ ឆ្នាំ២០២៤-២០២៨ឲ្យកាន់តែទូលំទូលាយ និងគ្រប់ជ្រុងជ្រោយ។
ឆ្នាំ២០២៣ ជាឆ្នាំចុងក្រោយនៃការអនុវត្តផែនការយុទ្ធសាស្រ្តនារីរតនៈទី៥ និងជាឆ្នាំដែលត្រូវចាប់ផ្តើមគិតគូរ និងតាក់តែងនារីរតនៈទី៦ ២០២៤-២០២៨ តាមរយៈការពិនិត្យ មើលលើការអនុវត្តផែនការយុទ្ធសាស្រ្តកន្លងមក និងការសិក្សាពាក់ព័ន្ធនឹងការប៉ាន់ប្រមាណយេនឌ័រ ដើម្បរៀបចំទិសដៅបន្តនិងយុទ្ធសាស្រ្តអាទិភាព ឲ្យឆ្លើយតបនឹងរបៀបវារៈនិងកម្មវិធីនយោបាយថ្មីរបស់រាជរដ្ឋាភិបាល រួមទាំងគោលការណ៍គន្លឹះៗ នៃអនុសញ្ញាស្តីពីការលុបបំបាត់រាល់ទម្រង់នៃការរើសអើងលើស្រ្តី ក្របខណ្ឌច្បាប់ និងគោលនយោបាយជាតិ កម្មវិធីកំណែទម្រង់នានារបស់រដ្ឋាភិបាល និងតាមវិស័យ។
ក្រសួងកិច្ចការនារី ជាយន្តការថ្នាក់ជាតិ ក្នុងការដឹកនាំសម្របសម្រួល ជំរុញ និងតាមដានការអនុវត្តការបញ្ជ្រាបយេនឌ័រ និងបង្កើនភាពអង់អាចដល់ស្ត្រីនៅកម្ពុជា។
កិច្ចប្រជុំនេះ មានសមាសភាពចូលរួមសរុបប្រមាណ១០០នាក់ ជាថ្នាក់ដឹកនាំក្រសួង និងមន្ទីរកិច្ចការនារីរាជធានី ខេត្ត ៕
