ឯកឧត្តម ស្វាយ សំអ៊ាង អញ្ជើញដឹកនាំកិច្ចប្រជុំផ្សព្វផ្សាយ សេចក្តីសម្រេចចិត្តនៃមហាសន្និបាត វិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា

ភ្នំពេញ៖ ឯកឧត្តម ស្វាយ សំអ៊ាង សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សខេត្តស្ទឹងត្រែង នាថ្ងៃទី៥ ខែមករា ឆ្នាំ២០២៤ បានអញ្ជើញដឹកនាំកិច្ចប្រជុំផ្សព្វផ្សាយ សេចក្តីសម្រេចចិត្តនៃមហាសន្និបាត វិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា ។

កិច្ចប្រជុំនេះដែរ ក៏មានការអញ្ជើញចូលរួមពីសំណាក់ អនុប្រធានក្រុមការងារគណបក្សចុះមូលដ្ឋានខេត្តស្ទឹងត្រែង ឯកឧត្តម លោកជំទាវ លោក លោកស្រីសមាជិក សមាជិការគណបក្សសរុបចំនួន ២១៨រូប ។

បើតាមសេចក្ដីជូនដំណឹងស្តីពីលទ្ធផល នៃកិច្ចប្រជុំគណៈអចិន្ត្រៃយ៍គណៈកម្មាធិការគណបក្សខេត្តស្ទឹងត្រែង នៅថ្ងៃទី៤ ខែមករា ឆ្នាំ២០២៤ បានឲ្យដឹងថា ឆ្លងតាមស្មារតីនៃកិច្ចប្រជុំគណៈអចិន្ត្រៃយ៍គណៈកម្មាធិការគណបក្សខេត្ត នាថ្ងៃទី២១ ខែតុលា ឆ្នាំ២០២៣ ក្រោមអធិបតីភាព ឯកឧត្តម ស្វាយ សំអ៊ាង សមាជិកគណៈកម្មាធិការកេណ្តាល និងជាប្រធានគណៈកម្មាធិការ គណបក្សខេត្ត នៅមន្ទីរគណបក្សខេត្ត។ អង្គប្រជុំបានពិនិត្យ ពិភាក្សា និងសម្រេចដូចខាងក្រោម៖

១. មន្ទីរគណបក្សខេត្ត ត្រូវកែសម្រួលខ្លឹមសារនៃឯកសារចំនួន៣ រួមមាន៖ ១- សេចក្តីសម្រេច ស្តីពីការកែសម្រួលការចាត់តាំងសមាសភាពគណៈបញ្ជាការយុទ្ធនាការបោះឆ្នោតខេត្ត, ២. សេចក្តីណែនាំ ស្តីពីការអនុវត្ត ផែនការរួមឆ្ពោះទៅកាន់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ និងទី៣- ផែនការសកម្មភាពសំខាន់ៗ ឆ្ពោះទៅកាន់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ រួចដាក់ជូនប្រធានគណៈកម្មាធិការគណបក្សខេត្ត និងឯកឧត្តមសន្តិបណ្ឌិតប្រធានក្រុមការងារគណបក្សចុះមូលដ្ឋានខេត្ត ពិនិត្យ ចុះហត្ថលេខា និងផ្សព្វផ្សាយ អនុវត្ត។

២. សមាសភាពចូលរួមក្នុងកិច្ចប្រជុំគណៈកម្មាធិការគណបក្សខេត្ត ត្រូវតែជាសមាជិកគណៈកម្មាធិការគណបក្សខេត្ត ពុំអាចឲ្យតំណាងចូលជំនួសបានឡើយ។ មន្ទីរគណបក្សខេត្ត ត្រូវត្រួតពិនិត្យការងារនេះ តាមរយៈការចេញលិខិត អញ្ជើញ និងវត្តមានចូលរួម។ ក្នុងករណីអវត្តមានដោយសារមានធុរៈចាំបាច់ ឬបេសកកម្ម ត្រូវសុំការអនុញ្ញាតិច្បាប់
មកគណបក្សខេត្តឲ្យបានត្រឹមត្រូវ។

៣. ត្រូវពង្រឹងរបៀបរបបការងារគណបក្សឲ្យបានម៉ឺងម៉ាត់បន្ថែមទៀត។ ក្នុងករណីសាខាគណបក្ស ឬគណបក្ស ក្រុង ស្រុក ផ្តល់របាយការណ៍មានការយឺតយ៉ាវ ឬពុំបានផ្តល់របាយការណ៍មន្ទីរគណបក្សខេត្តពុំបានទៀងទាត់ ត្រូវមានកិច្ចប្រជុំណែនាំដែលកិច្ចប្រជុំនេះ ត្រូវដឹកនាំដោយឯកឧត្តមប្រធានគណៈប្រចាំការគណបក្សខេត្ត។

៤. ត្រូវពិនិត្យឯកសារពាក់ព័ន្ធ និងពង្រឹងការគ្រប់គ្រងសារពើភ័ណ្ឌទ្រព្យសម្បត្តិគណបក្សឲ្យបានម៉ត់ចត់ និង ត្រឹមត្រូវ។ គណៈកម្មាធិការហិរញ្ញវត្ថុគណបក្សខេត្ត ត្រូវទទួលមុខការលើការងារនេះ នឹងត្រូវចាត់ចែងគ្រប់គ្រងចំណូល ដែលបានមកពីការជួលទីតាំងដីអង់តែនសេវាទូរស័ព្ទទាំង៤ទីតាំង ដើម្បីជាប្រយោជន៍សម្រាប់គណបក្ស។

៥. ត្រូវចូលរួមជម្រុញការត្រួតពិនិត្យ តាមដាន និងអនុវត្តតួនាទី ភារកិច្ច ដូចមានចែងក្នុងសេចក្តីសម្រេច ស្តីពីការចាត់តាំងសមាសភាពគណៈបញ្ជាការយុទ្ធនាការបោះឆ្នោតខេត្ត ព្រមទាំងផែនការណែនាំ និងផែនការសកម្មភាព ឆ្ពោះទៅកាន់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ដែលបានដាក់ចេញ ៕