ភ្នំកំពង់ត្រាច ជារមណីយដ្ឋានធម្មជាតិ និងប្រវត្តិសាស្ត្រ ដ៏ទាក់ទាញនៅខេត្តកំពត

ភ្នំពេញ៖ ប្រធានមន្ទីរទេសចរណ៍ខេត្តកំពត បានឱ្យដឹងថា ភ្នំកំពង់ត្រាច ជារមណីយដ្ឋានធម្មជាតិនិងប្រវត្តិសាស្ត្រមួយ ដែលទាក់ទាញបំផុតសម្រាប់ភ្ញៀវទេសចរដែលចង់ទៅកម្សាន្តនៅតំបន់ទេសភាពប្លែកភ្នែក ខ្យល់អាកាសបរិសុទ្ធ រូងភ្នំមានខ្យល់ត្រជាក់ ដែលអាចធ្វើឱ្យអ្នកទៅកម្សាន្តទទួលបានអារម្មណ៍ស្រស់ស្រាយ។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានមាន ប្រសាសន៍ប្រាប់វិទ្យុជាតិកម្ពុជាថា ភ្នំកំពង់ត្រាច គឺជារមណីយដ្ឋានដ៏ទាក់ទាញមួយសម្រាប់អ្នកស្រឡាញ់ធម្មជាតិ និងប្រវត្តិសាស្ត្រ ហើយរូងភ្នំដែលមានទិដ្ឋភាពដ៏ស្រស់ស្អាត ទឹកល្អាងដ៏ត្រជាក់ចិត្ត និងទីសក្ការៈផ្សេងៗ ដ៏ស័ក្តិសិទ្ធ បានធ្វើឱ្យភ្ញៀវទេសចរជាតិ និងអន្តរជាតិ មានអនុស្សាវរីយ៍ដែលមិនអាចបំភ្លេចបាន ។

លោក ប្រធានមន្ទីរទេសចរណ៍ខេត្តកំពត បានបន្តថា នៅកណ្តាលភ្នំ ភ្ញៀវទេសចរអាចផ្តិតយកទិដ្ឋភាពផ្ទៃមេឃដ៏ធំល្វឹងល្វើយ អមដោយម្លប់ឈើដ៏ត្រឈឹងត្រឈៃ អាចទស្សនាសិលាចារឹកជាច្រើន និងមានសំឡេងសត្វយំ។ ចំណែកឯនៅផ្នែកខាងក្រៅ ភ្ញៀវទេសចរឃើញផ្ទាំងថ្មធំៗ វាលស្រែទូលាយ និងមានរទេះសេះផ្តល់សេវាកម្មកម្សាន្តជុំវិញភ្នំ ផងដែរ។ រីឯនៅជាប់ជើងភ្នំ មានបង្កប់ល្អាងមួយ ដែលមានទឹកថ្លាឈ្វេង គឺល្អាងព្រះចន្ទ ដែលភ្ញៀវទេសចរអាចងូតទឹកលេងបានយ៉ាងសប្បាយ។

លោកប្រធានមន្ទីរទេសចរណ៍ខេត្តកំពត បានបន្តទៀតថា ភ្ញៀវទេសចរ ដែលកម្សាន្តនៅរមណីយដ្ឋានភ្នំកំពង់ត្រាច អាចទស្សនាថ្មសំណាករូបភាពផ្សេងៗ ដែលបង្កប់ដោយប្រវត្តិសាស្ត្រ វប្បធម៌ ដែលមានអាយុកាលដ៏យូរលង់ មានកន្លែងសក្តិសិទ្ធដើម្បីបួងសួងសុំសេចក្តីសុខផងដែរ។

« ភ្នំកំពង់ត្រាចគឺយើងបើកទទួលភ្ញៀវទេសចរយូរហើយ ដែលទីនោះមានលក្ខណៈធម្មជាតិមិនទាន់មានអ្វីត្រូវកែលម្អបន្ថែមទេ ព្រោះយើងបានរៀបចំមណ្ឌលព័ត៌មានទេសចរណ៍ តូបលក់អាហាររបស់បងប្អូនប្រជាពលរដ្ឋនៅទីនោះ និងមានការរៀបចំផ្លូវដើរ។ ហើយភ្ញៀវទេសចរដែលទៅកម្សាន្តទីនោះមានច្រើនទម្រង់ ភ្ញៀវទេសចរដែលជាយុវវ័យទៅមើលទេសភាព ថតរូប ចំណែកចាស់ៗអាចទៅបន់ស្រន់ តាមស្ថានភាពខុសៗគ្នា »។

សូមបញ្ជាក់ថា ភ្នំកំពង់ត្រាច គឺ ស្ថិតនៅតាមបណ្តោយផ្លូវជាតិលេខ៣៦ ក្នុងឃុំដំណាក់កន្ទួតខាងត្បូង ស្រុកកំពង់ត្រាច មានចម្ងាយ៣៨គីឡូម៉ែត្រ ប៉ែកខាងកើតខេត្តកំពត។ រមណីយដ្ឋានភ្នំកំពង់ត្រាច ឬភ្នំបាក់នេះ មាន កម្ពស់ពី ១៥០ ទៅ ២០០ម៉ែត្រ។ ភ្នំកំពង់ត្រាច លាក់ទុករឿងរ៉ាវគួរឱ្យចាប់អារម្មណ៍ជាច្រើន។ ភ្នំថ្មកំបោរមួយនេះ មានល្អាងតូចធំរាប់សិបកន្លែង និងមានរូងភ្នំធំ រួមមាន រូងឋានព្រះចន្ទ រូងឋានព្រះអាទិត្យ ល្អាងស្ការហនុមាន គុហាជាងលុកម៉ីន រូងភ្នំត្រីបាឡែន និងរូងភ្នំក្បាលអន្ទុង ជាដើម៕ ប្រភព៖ ក្រសួងព័ត៌មាន