រាត្រីថ្ងៃសុក្រ ជាទិវាដ៏រីករាយរបស់គ្រួសារបរិស្ថាន ដើម្បីអបអរជ័យជំន្នះ៧មករា និងអបអរសាទរឆ្នាំថ្មីឆ្នាំសាកល២០២៤

ភ្នំពេញ៖ ពន្លឺភ្លើងភ្លឹបភ្លែតរត់ប្រដេញគ្នា លាយឡំនឹងសំឡេងហ៊ោសប្បាយរីករាយយ៉ាងអ៊ឺងកងរបស់គ្រួសារបរិស្ថាន ក្នុងរាត្រីជួបជុំនាយប់ថ្ងៃសុក្រទី៥ មករា ឆ្នាំ២០២៤ នៅធ្លាកំសាន្តនាមាត់ទន្លេមេគង្គ ក្នុងភូមិចំបក់មាស សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ដើម្បីអបអរឆ្នាំថ្មី ជោគជ័យថ្មីរបស់នាវាបរិស្ថានដែលបានឆ្ពោះទៅការអភិវឌ្ឍដោយចីរភាពដែលមានត្រីវិស័យតម្រង់ទិសពីយុទ្ធសាស្រ្តចក្រាវិស័យបរិស្ថានឆ្នាំ២០២៤ -២០២៨ ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជាដំណាក់កាលទី១។

ជាមួយនឹងការអបអរជ័យជម្នះ ឆ្នាំថ្មីរបស់គ្រួសារបរិស្ថាននេះ ឯកឧត្តមបណ្ឌិត អ៊ាង សុផល្លែត បានថ្លែងអំណរគុណចំពោះមហាគ្រួសារបរិស្ថានដែលបានបំពេញភារកិច្ចយ៉ាងសស្រាក់សស្រាំពោរពេញដោយភាពសាមគ្គី ក្នុងបុព្វហេតុជាតិដើម្បីប្រជាពលរដ្ឋកម្ពុជារស់ដោយសុខសាន្តក្រោមដំបូលសន្តិភាពនៃការដឹកនាំដ៏ឆ្នើមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ លើសពីនេះ ដើម្បីជាការកម្សាន្តផង និងអន្ទងព្រលឹងដួងវិញ្ញាណខ្មែរនៅឋិតក្នុងបេះដូងគ្រួសារបរិស្ថានផង មហាគ្រួសារបរិស្ថានបានច្រៀងចំរៀងយើងខ្មែរតែមួយរួមគ្នាយ៉ាងរីករាយក្រៃលែង។

នៅឆ្នាំថ្មីឆ្នាំ២០២៤នេះ នាវាបរិស្ថានក្នុងបេសកកម្មដើម្បីភាពស្អាត ភាពបៃតង និងចីរភាព នឹងបន្តជោគជ័យដ៏ត្រចះត្រចង់ទៀត តាមរយៈការរីកសាយភាយភាពស្អាតរបស់ខ្លួនទៅដល់រាជធានី ខេត្តទូទាំងប្រទេស ដោយការចូលរួមរបស់សិស្សានុសិស្ស និងប្រជាពលរដ្ឋកម្ពុជាជិត ៤លាននាក់ នាឆ្នាំ២០២៣កន្លងមក៕