ឯកឧត្តម កែវ រតនៈ ដឹកនាំធ្វើពិធីអបអរសាទរខួបអនុស្សាវរីយ៍លើកទី៤៥ ទិវាជ័យជម្នះ ៧មករា នៅខេត្តពោធិ៍សាត់

ភ្នំពេញ៖ ឯកឧត្តម កែវ រតនៈ សមាជិកគណៈកម្មាធិការកណ្ដាលគណបក្ស និងជាប្រធានក្រុមការងារចុះជួយខេត្តពោធិ៍សាត់ នៅទី៧ ខែមករា ឆ្នាំ២០២៤នេះ បានអញ្ជើញដឹកនាំធ្វើពិធី អបអរសាទរខួបអនុស្សាវរីយ៍លើកទី៤៥ ទិវាជ័យជម្នះ៧មករា (៧ មករា ១៩៧៩- ៧ មករា ២០២៤) នៅក្នុងខេត្តពោធិ៍សាត់។

នាឱកាសនោះដែរ ឯកឧត្តម កែវ រតនៈ បានឲ្យដឹងថា រយៈពេល៤៥ឆ្នាំបន្ទាប់ពីជ័យជម្នះ ៧ មករា ១៩៧៩ ប្រទេសកម្ពុជាបានឆ្លងកាត់របត់នយោបាយ និងសេដ្ឋកិច្ចជាច្រើនដំណាក់កាល និងបានផ្លាស់ប្តូរមុខមាត់ថ្មីលើគ្រប់វិស័យ បានបញ្ចប់សង្គ្រាមស៊ីវិលដ៏រ៉ាំរ៉ៃ នាំមកនូវសន្តិភាព ឯកភាពជាតិ ឯកភាពទឹកដី និងការអភិវឌ្ឍ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សមេ្តចតេជោ ហ៊ុន សែន។

ឯកឧត្តម បានបញ្ជាក់ថា ប្រជាជនកម្ពុជាចងចាំជានិច្ច «បើគ្មានជ័យជម្នះ ៧មករា ១៩៧៩ យើងក៏គ្មានជីវិត និងការអភិវឌ្ឍលើគ្រប់វិស័យដូចសព្វថ្ងៃដែរ» ជាពិសេសក្នុងខេត្តពោធិ៍សាត់ទាំងមូល នេះគឺជាសច្ចភាពប្រវត្តិសាស្រ្តកម្ពុជា ដែលគ្មានជនណា ឬកម្លាំងណាអាចមកបំភ្លៃ បំផ្លើស និងបំផ្លាញបានឡើយ។

ឯកឧត្តម កែវ រតនៈ បន្ថែមថា រាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កំពុងបន្តដឹកនាំនាវាកម្ពុជា និងធានាបាននិរន្តរភាពជាតិ សន្តិភាព ស្ថិរភាព ដែលជាមូលដ្ឋានគ្រឹះក្នុងការអភិវឌ្ឍប្រទេសជាតិលើគ្រប់វិស័យ៕