សម្តេចធិបតី៖ លិទ្ធផលការបោះឆ្នោតកន្លងទៅនេះ ជាការបង្ហាញនៃការពេញចិត្តក្នុងការដឹកនាំប្រទេស របស់បក្សប្រជាជន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា លិទ្ធផលនៃការបោះឆ្នោតនាពេល កន្លងទៅនេះ គឺជាការបង្ហាញនៃការពេញចិត្តក្នុងការដឹកនាំប្រទេស របស់គណបក្សប្រជាជនកម្ពុជា។
សម្តេចធិបតី មានប្រសាសន៍យ៉ាងដូច្នេះ ក្នុងឱកាសដែលសម្តេច បានអញ្ជើញសម្ពោធដាក់ឱ្យប្រើប្រាស់ជាផ្លូវការ ស្ពានសម្តេចតេជោ ហ៊ុន សែន កោះយ៉ និងជួបសំណេះសំណាលជាមួយ បងប្អូនកម្មករ និយោជិតចំនួន ១១,០០០នាក់ ក្នុងស្រុកមណ្ឌលសីមា ខេត្តកោះកុង នាព្រឹកថ្ងៃទី៨ ខែមករា ឆ្នាំ២០២៤នេះ។
សម្តេចធិបតី ហ៊ុន ម៉ាណែត ក៏បានថ្លែងអំណរគុណចំពោះបងប្អូនប្រជាពលរដ្ឋដែលរស់នៅខេត្តកោះកុង ដែលបានបោះឆ្នោតជូនគណបក្សប្រជាជនកម្ពុជា នាពេលកន្លងទៅនេះ។
សម្តេចធិបតី នាយករដ្ឋមន្ត្រី មានប្រសាសន៍បន្តថា គោលនយោបាយនិងផែនការសកម្មភាពទាំងអស់ គឺដើម្បីបម្រើប្រជាពលរដ្ឋ និងរុញសេដ្ឋកិច្ចប្រជាពលរដ្ឋឱ្យកាន់តែប្រសើរ។
សូមបញ្ជាក់ថា នេះគឺជាលើកទី១១ និងជាជំនួបលើកដំបូងក្នុងឆ្នាំ២០២៤ ដែលសម្តេចធិបតី នាយករដ្ឋមន្ត្រី អញ្ជើញចុះជួបសំណេះសំណាលជាមួយនឹងបងប្អូនកម្មករនិយោជិតតាមបណ្តារោងចក្រ សហគ្រាសនានា ក្នុងឋានៈជានាយករដ្ឋមន្ត្រី នៃព្រះរាជាណាចក្រកម្ពុជា ៕
