សម្តេចធិបតី ឯកភាពឲ្យក្រសួង៥ ដំណើរការប្រលងរើសមន្ត្រី ដោយអនុវត្តន៍តាមការធ្វើកំណែទម្រង់ ប្រកបដោយភាពច្បាស់លាស់ និងត្រឹមត្រូវ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចារឯកភាពឱ្យក្រសួង ៥បន្ថែមទៀត ដំណើរការប្រលងជ្រើសរើសមន្ត្រី ដោយអនុវត្តន៍តាមការធ្វើកំណែទម្រង់ ប្រកបដោយភាពច្បាស់លាស់ និងត្រឹមត្រូវ។

ក្នុងឱកាសអញ្ជើញជួបសំណេះសំណាលជាមួយសិស្សនិទ្ទេស A ក្នុងឆ្នាំសិក្សា២០២២-២០២៣ សរុប ១,៦៩១នាក់ រាប់ទាំងបេក្ខជនអប់រំបច្ចេកទេស ១៨នាក់ នៅមជ្ឈមណ្ឌល ពាណិជ្ជកម្មជ្រោយចង្វារ (OCIC) នាថ្ងៃទី៩ ខែមករា ឆ្នាំ២០២៤នេះ សម្តេចធិបតី ហ៊ុន ម៉ានណែត បានបញ្ជាក់ថា «អីឡូវល្ងាចមិញខ្ញុំបានចារឯកភាពឱ្យ៥ក្រសួងទៀត ដែលនៅជំពាក់សម្រាប់រើសមន្ត្រីក្របខណ្ឌឆ្នាំ២០២៣ ដែលនៅសល់៥ ស្ថាប័នទៀតប្រលងដែរ ព្រោះកាលដែលយើងបង្កើតរដ្ឋាភិបាលថ្មីមាន៦ស្ថាប័ន ដែលត្រូវប្រលងមានក្រសួងអប់រំ មានប្រលង២តង់ ក្រសួងកសិកម្ម ក្រសួងសាធារណការ និងដឹកជញ្ជូន និងក្រសួងប៉ុន្មានទៀត ខ្ញុំឱ្យរៀបចំនីតិវិធីថ្មីសិន ដើម្បីយើងធ្វើ ហើយវាជារបត់មួយក្នុងការពង្រឹងស្ថាប័ន ដើម្បីលើកទឹកចិត្ត»។

សម្តេចធិបតី គូសបញ្ជាក់ថា បរិមាណជារឿងមួយ ប៉ុន្តែគុណភាពត្រូវបង្កើតបរិស្ថានមួយ ដែលអាចរីកលូតលាស់ទាំងមន្ត្រីថ្មីដែលរើស ទាំងមន្ត្រីដែលមានស្រាប់ និងប្រព័ន្ធលើកទឹកចិត្តដែលភ្ជាប់ជាមួយ នឹងលទ្ធផលការងារ ហើយនេះគឺជាអ្វីដែលយើងត្រូវធ្វើ គឺការធានានូវបរិស្ថានមួយ ដើម្បីលើកទឹកចិត្តដល់អ្នកទាំងអស់គ្នានៅក្នុងការធ្វើ ហើយនេះជាគោលដៅមួយ ។

សម្តេចធិបតីថ្លែងថា មន្ត្រីជាច្រើននៅតាមបណ្តាក្រសួង ស្ថាប័ន ក៏ត្រូវបានបញ្ជូនទៅសិក្សានៅក្រៅប្រទេស និងបានវិលត្រឡប់មកវិញដោយនាំមកនូវចំណេះជំនាញថ្មីៗ សម្រាប់បម្រើប្រទេសជាតិ ៕