អាជ្ញាធរហាមបោះតង់កម្សាន្តពេលយប់ នៅក្បាលកោះល្ង ទល់មុខវារីអគ្គិសនីដនសាហុង ព្រំដែនទឹកកម្ពុជា-ឡាវ
ភ្នំពេញ៖ លោក លី មីណា អភិបាលស្រុកបុរីអូស្វាយសែនជ័យ បានហាមឃាត់មិនឲ្យភ្ញៀវទេសចរណ៍ជាតិ និងអន្តរជាតិទៅសម្រាកលេងកម្សាន្តនៅក្បែរកោះល្ង ភូមិអន្លង់ឈើទាល ឃុំព្រះរំកិល ព្រោះនៅទីនោះជាចំណុចខ្សែបន្ទាត់ព្រំដែនរវាងកម្ពុជា-ឡាវ។
លោកបន្តថា នៅចំណុចនោះមានកម្លាំងសមត្ថកិច្ចឈរជើងចាំទប់ទល់បទល្មើសឆ្លងដែននានា ការជួញដូរមនុស្សឆ្លងដែនខុសច្បាប់ និងជាពិសេសនោះគឺបទល្មើសគ្រឿងញៀន ទើបរដ្ឋបាលខេត្តបានចេញសេចក្តីជូនដំណឹង ដើម្បីលើកកម្ពស់ផ្នែកការពារសណ្តាប់ធ្នាប់នៅមូលដ្ឋាន ប៉ុន្តែជាសាធារណ:អាចទៅលេងនៅទីនោះបាននៅពេលថ្ងៃជាធម្មតា តែត្រូវជូនដំណឹងដល់សមត្ថកិច្ចដែលឈរជើងនៅទីនោះជាមុនសិន។
ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង បានឲ្យដឹងដែរថា ភ្ញៀវទេសចរណ៍អាចទៅកម្សាន្តនៅអន្លង់ឈើទាលបាន ប៉ុន្តែមិនអនុញ្ញាតឲ្យជិះទូកឆ្លងដែននៅក្បែរកោះល្ងទេ ព្រោះមានសមត្ថកិច្ចយាមកាមយ៉ាងតឹងរឹង ដើម្បីសន្តិសុខជាតិ សុវត្ថិភាព និងបញ្ចៀសហានិភ័យផ្សេងៗ ។
សមាជិកសមាគមន៍ផ្សោតព្រះរំកិលលោក ផយ វណ្ណា បានបញ្ជាក់ផងដែរថា ក្រៅពីតំបន់ហាមឃាត់នេះអ្នកទេសចរណ៍អាចធ្វើដំណើរតាមទូករបស់សហគមន៍ទៅបោះតង់នៅតាមដងទន្លេមេគង្គបានដូចជា នៅតាមពំនូកខ្សាច់ទល់មុខព្រះរំកិល កោះឈើទាលតូច កោះឈើទាលធំ កោះល្ង កោះពាង កោះទន្សាយ កោះបន្ទាយ កោះភ្នៅទីតាំងកោះលន់ប្រវត្តិសាស្ត្រដំរីស និងកោះសំបួរអន្លង់មរកត តាមដងទន្លេមេគង្គតែម្តង។
សូមបញ្ជាក់ថា នៅរមណីយដ្ឋានអេកូទេសចរណ៍ព្រះរំកិល សត្វផ្សោតបានបាត់បង់ ២ឆ្នាំមកហើយ ប៉ុន្តែជំនួសមកវិញដោយ ប្រជាសហគមន៍បានរៀបចំទូកជូនភ្ញៀវទេសចរណ៍ទៅកាន់តំបន់ធនធានជីវ:ចម្រុះនៅតាមដងទន្លេមេគង្គ ដើម្បីអភិរក្សរមណីយដ្ឋាននេះឲ្យមាននិរន្តរភាព ព្រោះភ្ញៀវទេសចរណ៍បានមកកម្សាន្តជាខ្សែរសង្វាក់ចេញពីតំបន់ព្រះរំកិល ហើយបន្តដំណើរទៅកាន់ធនធានធម្មជាតិព្រះនិមិត្តបន្តទៀត៕
