អាជ្ញាធរជាតិអប្សរាសហការជាមួយអង្គការមរតកវប្បធម៌ខ្មែរ បើកកម្មវិធីអប់រំបេតិកភណ្ឌ នៅសាលាបឋមសិក្សាក្របីរៀល

ភ្នំពេញ៖ នាព្រឹកថ្ងៃទី១១ ខែមករា ឆ្នាំ២០២៤ អាជ្ញាធរជាតិអប្សរាសហការជាមួយអង្គការមរតកវប្បធម៌ខ្មែរ(Khmer Heritage Organization) បានបើកកម្មវិធីអប់រំបេតិកភណ្ឌនៅសាលាបឋមសិក្សាក្របីរៀល ក្រោមអធិបតីឯកឧត្តម ឡុង កុសល អគ្គនាយករងនៃអាជ្ញាធរជាតិអប្សរា។

កម្មវិធីអប់រំបេតិកភណ្ឌនៅសាលាបឋមសិក្សាក្របីរៀលនេះ បានដំណើរការតាំងពីឆ្នាំ២០២០ ដែលមានសិស្សានុសិស្សចូលរួមសរុបប្រមាណជាង៧០០នាក់ ដែលក្នុង១ឆ្នាំៗមានសិស្សប្រមាណ២០០នាក់មកពីថ្នាក់ទី៥ និងទី៦។ ជាទូទៅ កម្មវិធីអប់រំបេតិកភណ្ឌមានរយៈពេល៩ខែក្នុង១ឆ្នាំ។

នាឱកាសបើកកម្មវិធីអប់រំបេតិកភណ្ឌ ឯកឧត្តម ឡុង កុសល មានមតិសំណេះសំណាលទាក់ទងនឹងការរស់នៅរបស់អ្នកស្រុក កុមារ និងសិស្សានុសិស្សដែលមានភព្វសំណាងដែលបានកើត សិក្សារៀនសូត្រ និងរស់នៅក្នុងតំបន់ដែនដីដ៏ពិសិដ្ឋនៃអង្គរ ព្រមទាំងលើកទឹកចិត្តកោតសរសើរដល់លោកគ្រូ អ្នកគ្រូដែលបានចូលរួម និងសហការល្អក្នុងការដឹកនាំ និងជំរុញសិស្សានុសិស្សឱ្យសិក្សា និងអនុវត្តតាមកម្មវិធី។

មិនតែប៉ុណ្ណោះ ឯកឧត្តម ឡុង កុសល បានណែនាំសិស្សានុសិស្សឱ្យយកចិត្តទុកដាក់សិក្សារៀនសូត្រក្នុងកម្មវិធីអប់រំនេះ ដែលនឹងអាចផ្ដល់ប្រយោជន៍សំខាន់សម្រាប់ការងារអនាគត។ ជាពិសេស សិស្សានុសិស្សទាំងនេះ នឹងអាចជាអ្នកបន្តវេន និងជាអ្នកដឹកនាំដ៏ល្អលើវិស័យថែរក្សាការពារ និងគ្រប់គ្រងកេរមរតកវប្បធ៌មក្នុងសហគមន៍របស់ខ្លួន៕