សម្តេចធិបតី ណែនាំដល់ក្រសួងមហាផ្ទៃ ពិនិត្យលើការផ្ដល់ការតែងតាំងស្រ្តីឱ្យកាន់តំណែងជា អភិបាលរងខេត្ត ស្រុក ខណ្ឌ ឬខេត្តនិងសម្រួលកន្លែងធ្វើការឱ្យនៅក្បែរលំនៅឋាន

​

ភ្នំពេញ៖ ក្នុងឱកាសចូលរួមបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងកិច្ចការនារី នារសៀលថ្ងៃទី១១ ខែមករា ឆ្នាំ ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះ រាជាណាចក្រកម្ពុជា បានណែនាំដល់ក្រសួងមហាផ្ទៃ ពិនិត្យលើការផ្ដល់ការតែងតាំងស្រ្តីឱ្យកាន់តំណែងជា អភិបាលរងខេត្ត ស្រុក ខណ្ឌ ឬខេត្តនិងសម្របសម្រួលកន្លែងធ្វើការឱ្យនៅក្បែរលំនៅឋានមន្រ្ដីជាស្រ្ដីផងដែរ។

សម្ដេចធិបតីមានប្រសាសន៍ថា ស្រ្តីកម្ពុជាជាកម្លាំងចលករ ដែលបានរួមចំណែកក្នុងកំណើនសេដ្ឋកិច្ចកន្លងមក ហើយបច្ចុប្បន្នស្ត្រីមានឱកាសក្នុងការអនុវត្តសិទ្ធិ អភិវឌ្ឍន៍ចំណេះដឹង និងជំនាញ ដែលជាមូលដ្ឋានគ្រឹះក្នុងការចូលរួមប្រកួតប្រជែងប្រកបដោយសក្ដានុពលនៅក្នុងសេដ្ឋកិច្ច ថ្នាក់ជាតិ និងថ្នាក់តំបន់។

សម្ដេចធិបតីថ្លែងថា កម្មវិធីនយោបាយរបស់រាជរដ្ឋាភិបាល នីតិកាលទី៧ បានបន្តកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្រ្តី និងក្មេងស្រីនៅគ្រប់វិស័យជាអាទិភាព តាមរយៈការពង្រឹងភាពជាពលរដ្ឋល្អ ក្នុងសង្គមដែលមានអារ្យធម៌ខ្ពស់ ប្រកបដោយសីលធម៌ សមធម៌ គុណធម៌ និងបរិយាបន្ន៕