ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក ជួបប្រជុំជាមួយប្រតិភូសហភាពអឺរ៉ុប ប្រចាំកម្ពុជា
ភ្នំពេញ៖ នៅថ្ងៃទី១២ ខែមករា ឆ្នាំ២០២៤ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម អមដោយឯកឧត្តមរដ្ឋលេខាធិការ អនុរដ្ឋលេខាធិការ និងសហការី បានអញ្ជើញជួបប្រជុំទ្វេភាគីជាមួយប្រតិភូសហភាពអឺរ៉ុប ដឹកនាំដោយ ឯកឧត្តមអនុប្រធានស្ថានតំណាងសហភាពអឺរ៉ុបប្រចាំកម្ពុជា។
ឯកឧត្តមរដ្ឋលេខាធិការបានឱ្យដឹងថា កិច្ចប្រជុំគឺដើម្បីត្រួតពិនិត្យលើវឌ្ឍនភាពការសាងសង់មជ្ឈមណ្ឌលជាតិគ្រប់គ្រងទឹក បញ្ជាទឹក និងប្រើប្រាស់ទឹកក្នុងក្របខណ្ឌទូទាំងប្រទេស តាមរយៈគម្រោងកែលម្អវិស័យធារាសាស្រ្តក្រោមហិរញ្ញប្បទានពីធនាគារអភិវឌ្ឍន៍អាស៊ី(ADB)និងសហហិរញ្ញប្បទានពីធនាគារវិនិយោគអឺរ៉ុប(EIB)។
ឯកឧត្តមរដ្ឋលេខាធិការបានបន្តឱ្យដឹងថា កិច្ចប្រជុំនេះជាការឈានមួយជំហានថ្មីទៀតក្នុងសករាជថ្មី ដើម្បីពង្រឹងពង្រីកកិច្ចសហប្រតិបតិ្តការថ្មីៗ បន្ថែមទៀត ជាមួយក្រសួងធនធានទឹក និងឧតុនិយម លើការគ្រប់គ្រងវិស័យធនធានទឹក និងឧតុនិយមរបស់ព្រះរាជាណាចក្រកម្ពុជាទាំងលើផ្នែកទន់ និងផ្នែករឹង។
ឯកឧត្តមរដ្ឋលេខាធិការបញ្ជាក់ថា នឹងបន្តធ្វើការពិភាក្សាលំអិតបន្ថែមទៀតជាមួយឯកឧត្តមឯកអគ្គរដ្ឋទូត និងឯកឧត្តមឯកអគ្គរដ្ឋទូតរងរបស់សហភាពអឺរ៉ុប(EU) លើពិធីសារលំអិត និងអនុស្សរណៈនៃការយោគយល់គ្នា(MOU) សម្រាប់បណ្តាកម្មវិធីសហប្រតិបត្តិការធំៗខាងលើ ក្នុងការគ្រប់គ្រងវិស័យធនធានទឹក និងឧតុនិយមរបស់ព្រះរាជាណាចក្រកម្ពុជា ជូនឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម ចុះហត្ថលេខាជាមួយឯកឧត្តមអគ្គនាយកសហភាពអឺរ៉ុប នៅស្ថានតំណាងកណ្តាលរបស់សហភាពអឺរ៉ុប ក្នុងទីក្រុងព្រុចសែល ប្រទេសប៊ែលហ្សិកនាពេលដ៏ខ្លីខាងមុខនេះ៕
