នាយករដ្ឋមន្ត្រី ហ៊ុន ម៉ាណែត៖ មានអ្នកខ្លះចោទថា ពលរដ្ឋដែលមកជួបសម្តេចត្រូវបានទិញទឹកចិត្ត

ភ្នំពេញ៖ ថ្លែងក្នុងពិធីជួបសំណេះសំណាលជាមួយបងប្អូនខ្មែរដែលកំពុងរស់នៅធ្វើការ និងសិក្សា ប្រមាណ ២,៥០០នាក់ នៅទ្វីបអឺរ៉ុប ដែលធ្វើឡើងនៅទីក្រុងប៉ារីស ប្រទេសបារាំង នៅយប់ថ្ងៃទី១៤ ខែមករា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា មានអ្នកខ្លះចោទថា ប្រជាពលរដ្ឋដែលមកជួបសម្តេច ត្រូវបានគេទិញទឹកចិត្ត ដែលប្រការនេះពុំមែនជារឿងត្រឹមត្រូវទាល់តែសោះហើយការលើកឡើងបែបនេះគឺជាការមើលស្រាលប្រជាពលរដ្ឋខ្មែរយើងនៅក្រៅប្រទេស។

សម្តេចធិបតី ហ៊ុន ម៉ាណែត បានគូសបញ្ជាក់ថា ស្មារតីនៃការរួមគ្នាក្នុងនាមជាជាតិខ្មែរ ទោះបីនៅទីណាក៏ដោយ សុខចិត្តរត់ស្កាត់រកគ្នាដើម្បីបានជួបគ្នា ដែលនេះបង្ហាញពីស្មារតីការស្រឡាញ់រាប់អានគ្នា។

សម្តេចធិបតី នាយករដ្ឋមន្ត្រី ក៏បានគូសបញ្ជាក់បន្ថែមថា ប្រជាពលរដ្ឋខ្មែរនៅក្រៅប្រទេស ក៏ចង់ដឹងពីសុខទុក្ខរបស់ប្រទេសជាតិរបស់ខ្លួន បើទោះបីជាពួកគាត់បានមករស់នៅក្រៅប្រទេសក៏ដោយ ក៏តែងតែគិតគូរពីប្រទេសជាតិទាំងអស់។

សម្តេចធិបតី នាយករដ្ឋមន្ត្រី បានបន្តថា ការមកជួបជុំគ្នានៅពេលនេះ ក៏ដើម្បីចង់ដឹងពីស្ថានភាពរបស់ប្រទេសជាតិ ចង់ដឹងពីសកម្មភាពដែលរាជរដ្ឋាភិបាលបាននិងកំពុងធ្វើ ពិសេសគឺចង់ដឹងពីសុខទុក្ខរបស់ប្រជាពលរដ្ឋ ៕