ជប៉ុនរឹតបន្តឹងច្បាប់ប្រើប្រាស់ដីក្បែរកន្លែងយោធាអាមេរិកចំនួន៦

តូក្យូ៖ រដ្ឋាភិបាលជប៉ុនកាលពីថ្ងៃចន្ទបានបន្ថែមយោធាអាមេរិកចំនួនប្រាំមួយ និងកន្លែងសំខាន់ៗផ្សេងទៀតទៅក្នុងបញ្ជីទីតាំងដែលការទិញ និងប្រើប្រាស់ដីនៅតំបន់ក្បែរនោះត្រូវស្ថិតនៅក្រោមបទប្បញ្ញត្តិកាន់តែតឹងរ៉ឹងក្នុងគោលបំណងការពារសន្តិសុខជាតិ។

ជាលើកដំបូង មូលដ្ឋានយោធារបស់សហរដ្ឋអាមេរិកត្រូវបានបញ្ចូលទៅក្នុងបញ្ជីទីតាំង ដែលឥឡូវនេះមានចំនួនសរុប ៣៩៩ ក្រោមច្បាប់គ្រប់គ្រងការប្រើប្រាស់ដីដែលបានអនុម័តក្នុងឆ្នាំ២០២១។ ទីតាំងចំនួនប្រាំមួយ រួមទាំងឃ្លាំងអាវុធចំនួនពីរនៅក្នុងខេត្ត Hiroshima ស្ថិតក្នុងចំណោមទីតាំងចំនួន ១៨០ ដែលត្រូវបានកំណត់ថ្មីនៅទូទាំង ២៥ នៃខេត្តចំនួន ៤៧ របស់ប្រទេស។

នេះជាលើកទីបីហើយដែលរដ្ឋាភិបាលបានកំណត់ពីរបៀបដែលដីអាចប្រើប្រាស់បានក្នុងចម្ងាយមួយគីឡូម៉ែត្រនៃទីតាំងដូចជាកន្លែងទាក់ទងនឹងវិស័យការពារជាតិ និងហេដ្ឋារចនាសម្ព័ន្ធសំខាន់ៗដូចជាព្រលានយន្តហោះ និងរោងចក្រថាមពល បន្ថែមពីលើកោះដាច់ស្រយាល។ ច្បាប់នេះត្រូវបានអនុម័តបន្ទាប់ពីគណបក្សប្រជាធិបតេយ្យសេរីដែលកំពុងកាន់អំណាចបានអំពាវនាវឱ្យមានបទប្បញ្ញត្តិតឹងរ៉ឹងលើការប្រើប្រាស់ដីក៏ដូចជាការទិញដីពីបរទេស។

គណបក្សប្រឆាំងមួយចំនួនបានសម្តែងការព្រួយបារម្ភអំពីច្បាប់នេះ ដោយបញ្ជាក់ថា វាអាចរឹតត្បិតសិទ្ធិពលរដ្ឋ ឬរដ្ឋាភិបាលអាចបំពានវា ដើម្បីគ្រប់គ្រងសកម្មភាពស្របច្បាប់ ដូចជាការប្រមូលផ្តុំគ្នាជុំវិញមូលដ្ឋានយោធាសហរដ្ឋអាមេរិកជាដើម។

ទីតាំងដែលបានកំណត់ថ្មីរួមមានក្រសួងការពារជាតិនៅទីក្រុងតូក្យូ អាកាសយានដ្ឋាន New Chitose នៅហុកកៃដូ និងរោងចក្រថាមពលនុយក្លេអ៊ែរ Ikata នៅខេត្ត Ehime។

ច្បាប់នេះផ្តល់សិទ្ធិអំណាចដល់អាជ្ញាធរក្នុងការត្រួតពិនិត្យកម្មសិទ្ធិលើដីនៅជិតកន្លែងដែលបានកំណត់ និងគ្រប់គ្រងសកម្មភាពនៅទីនោះ ដើម្បីការពារការជ្រៀតជ្រែកក្នុងប្រតិបត្តិការបរិក្ខារ ដូចជាការស្ទះវិទ្យុ។

រាល់ការបំពានលើបទបញ្ជារបស់រដ្ឋាភិបាលត្រូវជាប់ពន្ធនាគាររហូតដល់ ២ ឆ្នាំ ឬពិន័យជាប្រាក់រហូតដល់ ២ លានយ៉េន (១៣,៨០០ ដុល្លារ)។

រដ្ឋាភិបាលគ្រោងនឹងបន្ថែមទីតាំងចំនួន ១៨៤ បន្ថែមទៀតនៅក្នុងខេត្តចំនួន ២៨ សម្រាប់ការអនុម័តចុងក្រោយដោយក្រុមអ្នកជំនាញ។

ប្រភព៖ Kyodo News

ប្រែសម្រួលដោយ៖ ឡាយ លីហួ