មន្ត្រីជំនាញក្រសួងធនធានទឹក ដឹកនាំក្រុមការងារបច្ចេកទេស ចុះពិនិត្យការបាក់ច្រាំងទន្លេ ក្នុងខេត្តកំពង់ចាម
ភ្នំពេញ៖ នៅព្រឹកថ្ងៃទី១៦ ខែមករា ឆ្នាំ២០២៤ ឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេសនៃក្រសួងធនធានទឹក និងឧតុនិយម បានដឹកនាំក្រមការងារបច្ចេកទេសក្រសួងចុះពិនិត្យការបាក់ច្រាំងទន្លេ ក្នុងភូមិសាស្ត្រខេត្តកំពង់ចាម។
សូមជម្រាបថា ការចុះពិនិត្យការងារនាឱកាសនោះដឹកនាំដោយ ឯកឧត្តម អ៊ុន ចាន់ដា អភិបាលនៃគណ:អភិបាលខេត្តកំពង់ចាម រួមជាមួយឯកឧត្តម ច្រឹង គឹមស្រ៊ាន សមាជិកព្រឹទ្ធសភាមណ្ឌលភូមិភាគទី២ ឯកឧត្តមអភិបាលរងខេត្តនិងមន្ត្រីជំនាញពីមន្ទីរពាក់ព័ន្ធក្នុងខេត្តកំពង់ចាម ព្រមទាំងអាជ្ញាធរមូលដ្ឋានផងដែរ។
ឯកឧត្តមអគ្គនាយកបានឱ្យដឹងថា គណៈប្រតិភូ និងក្រុមការងារបច្ចេកទេសបានចុះពិនិត្យការបាក់ច្រាំងទន្លេនៅឃុំព្រែកកក់ ឃុំពាមកោះស្នា ឃុំព្រះអណ្តូង និងឃុំខ្ពបតាងួន ស្រុកស្ទឹងត្រង់ ខេត្តកំពង់ចាម ដែលមានប្រវែងជាង ១០០០ម៉ែត្រ ក្នុងនោះច្រាំងដែលប្រឈមបាក់ខ្លាំងត្រូវការពារបន្ទាន់មានប្រវែងសរុប ៦០០ម៉ែត្រ។
ឯកឧត្តមអគ្គនាយកបញ្ជាក់ថា ការបាក់ច្រាំងទន្លេនេះបណ្តាលមកពីបម្រែបម្រួលចរន្តទឹក ដោយសារការរីកដុះដីកាន់ធំនៃកោះនៅខាងមុខច្រាំងបាក់ និងជម្រាបទឹកក្រោមដីពីបឹងផ្នែកខាងលើ។
ក្នុងឱកាសនោះ ឯកឧត្តមអគ្គនាយកក៏បានណែនាំឱ្យក្រុមការងារបច្ចេកទេសនៃក្រសួងធនធានទឹក និងឧតុនិយមសិក្សាបន្ទាន់គម្រោងការពារច្រាំងនេះ ដើម្បីការពារទប់ស្កាត់ការបាក់ច្រាំងដល់ផ្លូវបេតុង និងផ្ទះសម្បែងប្រជាជនបន្តទៀត៕
