អ៉ីរ៉ង់ស្វែងរកកិច្ចសហប្រតិបត្តិការលើវិស័យឧស្សាហកម្ម បច្ចេកវិទ្យា និងសិប្បកម្ម
ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបឯកឧត្តម Ali Akbar Nazari ឯកអគ្គរដ្ឋទូតនៃសាធារណរដ្ឋ អ៉ីស្លាមអ៊ីរ៉ង់ និងពិភាក្សាអំពីឱកាសពង្រីកកិច្ចសហប្រតិបត្តិការលើវិស័យឧស្សាហកម្ម បច្ចេកវិទ្យា និងសិប្បកម្មរវាងប្រទេសទាំងពីរ។
នៅក្នុងជំនួបនោះ ឯកឧត្តមរដ្ឋមន្ត្រីបានជម្រាបជូនអំពីអាណត្តិកិច្ចរបស់ក្រសួង និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលដោយលើកឡើងពីភាពខ្លាំងរបស់អ៉ីរ៉ង់ក្នុងវិស័យមួយចំនួន ដូចជាឧស្សាហកម្ម ការសាងសង់ផ្លូវដែក រោងចក្រថាមពល វារីអគ្គិសនី វិស័យរ៉ែ និងបច្ចេកវិទ្យា ឯកឧត្តមឯកអគ្គរដ្ឋទូតបានបញ្ជាក់ថា អ៉ីរ៉ង់បានត្រៀមខ្លួនរួចជាស្រេច ដើម្បីសហការ ផ្ទេរបច្ចេកវិទ្យា និងវិនិយោគនៅកម្ពុជា។
ឯកឧត្តមបានរំលឹកថា ឆ្នាំ២០២៣ជាខួបលើកទី៣០ នៃទំនាក់ទំនងការទូតកម្ពុជា-អ៉ីរ៉ង់ ហើយអ៉ីរ៉ង់មានបំណងជំរុញទំនាក់ទំនងពាណិជ្ជកម្ម និងវិនិយោគរវាងប្រទេសទាំងពីរឱ្យកាន់តែមានសន្ទុះខ្លាំងឡើង ដោយផ្តោតលើទំនិញសំខាន់ៗមួយចំនួន ដូចជាអាលុយមីញ៉ូម ទង់ដែង និងដែកជាដើម។
ឯកឧត្តមឯកអគ្គរដ្ឋទូតក៏បានលើកឡើងពីភាពខ្លាំងរបស់អ៉ីរ៉ង់ក្នុងវិស័យសិប្បកម្ម ជាពិសេសសិប្បកម្ម ផលិតកម្រាលព្រំដ៏ល្បីល្បាញ និងផលិតផលសិល្បៈកែច្នៃពីទង់ដែង ឈើ និងដែក។
ឯកឧត្តមបានបង្ហាញចំណាប់អារម្មណ៍ក្នុងការសហការលើការអភិវឌ្ឍ និងបណ្តុះបណ្តាលជំនាញសម្រាប់វិស័យសិប្បកម្ម ដោយទាញយកប្រយោជន៍ពីប្រពៃណីដ៏សម្បូរបែបនៃសិល្បៈតំបន់ពែក្សរបស់អ៊ីរ៉ង់។
ឯកឧត្តម ហែម វណ្ណឌី បានទទួលស្គាល់សមត្ថភាព ក៏ដូចជាសក្តានុពលរបស់អ៊ីរ៉ង់ និងបានជម្រាប់អំពីរបបពាណិជ្ជកម្មសេរីរបស់កម្ពុជា ដែលគាំទ្រដោយច្បាប់វិនិយោគថ្មី និងរបបលើកទឹកចិត្តដ៏គួរឱ្យទាក់ទាញ។
ឯកឧត្តមបានលើកឡើងថា កម្ពុជាជាសមាជិកអាស៊ាន សមាជិកនៃកិច្ចព្រមព្រៀង RCEP និងកិច្ចព្រមព្រៀងពាណិជ្ជកម្មសេរីជាច្រើន ដែលផ្តល់ឱ្យអ្នកវិនិយោគនូវលទ្ធភាពចូលទៅកាន់ទីផ្សារយ៉ាងទូលំទូលាយ។ អាទិភាពមួយរបស់ក្រសួងគឺការលើកកម្ពស់ផលិតផលពាក់កណ្តាលសម្រេច និងកាត់បន្ថយការពឹងផ្អែកលើការនាំចូលវត្ថុធាតុដើម៕
