រុស្ស៊ី និងនីហ្សេរីយ៉ា ព្រមព្រៀងក្នុងបង្កើតទំនាក់ទំនងយោធាជាមួយគ្នា

ម៉ូស្គូ៖ ក្រសួងការពារជាតិរុស្ស៊ី បានឲ្យដឹងនៅថ្ងៃអង្គារ ទី១៦ ខែមករានេះថា ប្រទេសរុស្ស៊ី និងនីហ្សេរីយ៉ា ដែលស្ថិតនៅក្រោមការគ្រប់គ្រងយោធា ចាប់តាំងពីមានរដ្ឋប្រហារកាលពីឆ្នាំមុន បានព្រមព្រៀងគ្នាក្នុងការអភិវឌ្ឍន៍កិច្ចសហប្រតិបត្តិការយោធា។

យោងតាមទីភ្នាក់ងារសារព័ត៌មានរុស្ស៊ី អនុរដ្ឋមន្ត្រីការពារជាតិរុស្ស៊ី Yunus-Bek Yevkurov និង Alexander Fomin បានជួបជាមួយរដ្ឋមន្ត្រីការពារជាតិ Niger Salifu Modi កាលពីថ្ងៃអង្គារ។

ក្រសួងបានបន្តថា ភាគីបានកត់សម្គាល់ពីសារៈសំខាន់នៃការអភិវឌ្ឍទំនាក់ទំនងរុស្ស៊ី-នីហ្សេរីយ៉ាក្នុងវិស័យការពារជាតិ ហើយបានយល់ព្រមបង្កើនសកម្មភាពរួមគ្នាដើម្បីធ្វើឱ្យមានស្ថិរភាពស្ថានភាពក្នុងតំបន់។ ក្រសួងបានបន្ថែមថាវាមានបំណងបន្តការសន្ទនាលើការបង្កើនការត្រៀមខ្លួនប្រយុទ្ធ របស់យោធានីហ្សេរីយ៉ា។

ក្រុមប្រឹក្សាយោធារបស់ប្រទេសនីហ្សេរីយ៉ា ដឹកនាំដោយឧត្តមសេនីយ Abdourahamane Tiani បានឡើងកាន់អំណាច បន្ទាប់ពីបានទម្លាក់ប្រធានាធិបតី Mohamed Bazoum ក្នុងខែកក្កដា ឆ្នាំ២០២៣។

របបយោធារបស់នីហ្សេរីយ៉ាបានបណ្តេញកងទ័ពបារាំងចេញ និងកាត់ផ្តាច់កិច្ចព្រមព្រៀងសន្តិសុខជាមួយសហភាពអឺរ៉ុប ដែលធ្វើឱ្យសម្ព័ន្ធមិត្តលោកខាងលិចព្រួយបារម្ភថា ប្រទេសនេះអាចក្លាយជាមូលដ្ឋានថ្មីសម្រាប់រុស្ស៊ីនៅក្នុងតំបន់។

លោក Ali Mahamane Lamine Zeine នាយករដ្ឋមន្ត្រីដែលតែងតាំងដោយរបបយោធារបស់នីហ្សេរីយ៉ាក៏បានមកដល់ក្រុងម៉ូស្គូដែរ។ ក្នុងដំណើរទស្សនកិច្ចនេះ លោក Zeine មានបំណងពិភាក្សាពីការពង្រីកភាពជាដៃគូជាមួយរុស្ស៊ីក្នុងវិស័យការពារជាតិ កសិកម្ម និងថាមពល។

ទុនបំរុងអ៊ុយរ៉ាញ៉ូម និងប្រេងរបស់នីហ្សេរីយ៉ា និងតួនាទីសំខាន់របស់វាក្នុងការប្រយុទ្ធប្រឆាំងនឹងពួកសកម្មប្រយុទ្ធអ៊ីស្លាមនៅក្នុងតំបន់ Sahel ផ្តល់ឱ្យវានូវសារៈសំខាន់សេដ្ឋកិច្ច និងយុទ្ធសាស្ត្រសម្រាប់សហរដ្ឋអាមេរិក អឺរ៉ុប ចិន និងរុស្ស៊ី។

ប្រភព៖ Reuters

ប្រែសម្រួលដោយ៖ ឡាយ លីហួ