អង្គការ UNFPA សន្យាបន្តគាំទ្រក្រសួងផែនការ លើកិច្ចសហប្រតិបត្តិការដែលបានអនុវត្តរួមគ្នា

ភ្នំពេញ៖ នារសៀលថ្ងៃទី១៨ ខែមករា ឆ្នាំ២០២៣ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានទទួលជួបលោកស្រី Sandra Bernklau តំណាងមូលនិធិអង្គការសហប្រជាជាតិសម្រាប់ប្រជាជន (UNFPA) ប្រចាំនៅកម្ពុជា ចូលជួបសម្តែងការគួរសម និងពិភាក្សាការងារស្តីពីកិច្ចសហប្រតិបត្តិការជាមួយរាជរដ្ឋាភិបាលកម្ពុជា ជាពិសេសជាមួយក្រសួងផែនការ លើកម្មវិធីប្រចាំប្រទេសរបស់អង្គការ UNFPA សម្រាប់រយៈពេល ២០២៤-២០២៨។

ក្នុងឱកាសនេះដែរ ឯកឧត្តមរដ្ឋមន្ត្រី បានថ្លែងនូវការស្វាគមន៍ និងអរគុណចំពោះលោកស្រី ព្រមទាំងសហការី អញ្ជើញមកចូលជួបសម្តែងការគួរសម និងពិភាក្សាការងារនៅទីស្តីការក្រសួងផែនការ។ ឯកឧត្តមរដ្ឋមន្ត្រី ក៏បានថ្លែងនូវអំណរគុណផងដែរ ចំពោះកិច្ចសហប្រតិបត្តិការដ៏ល្អប្រសើរកន្លងមករវាងក្រសួងផែនការ និងអង្គការ UNFPA ប្រកបដោយលទ្ធផលផ្លែផ្កា លើការងារជំរឿន អង្កេតនានា ទាំងថវិកា និងបច្ចេកទេស ដែលជាផ្នែកមួយដែលធ្វើឱ្យល្អប្រសើរនូវប្រភពទិន្នន័យដែលមានសារៈសំខាន់បំផុត គាំទ្រដល់រាជរដ្ឋាភិបាលកម្ពុជា ព្រមទាំងភាគីពាក់ព័ន្ធ ក្នុងការរៀបចំផែនការ គោលនយោបាយ ទស្សនទានផ្សេងៗ ចាប់តាំងពីឆ្នាំ១៩៩៨មក ជាមួយនឹងផ្តល់នូវការបណ្តុះបណ្តាលធនធានមនុស្ស ជាពិសេសមន្ត្រីស្ថិតិក្នុងកិច្ចការធ្វើជំរឿន អង្កេតនេះ ឯកឧត្តមរដ្ឋមន្ត្រី មានបំណងធ្វើឱ្យកាន់តែប្រសើរឡើងថែមទៀតនូវការធ្វើជំរឿន អង្កេតមានលក្ខណៈវិទ្យាសាស្ត្រ បច្ចេកទេសទំនើប ដែលទាមទារឱ្យមានធនធានសម្រាប់គាំទ្រផងដែរ ដែលឯកឧត្តមរដ្ឋមន្ត្រី បានស្នើដល់ អង្គការ UNFPA ពិនិត្យមើលលទ្ធភាពបន្ថែមដើម្បីគាំទ្រដល់កិច្ចការងារនេះ។

ក្រៅពីការងារពាក់ព័ន្ធនឹងវិស័យទិន្នន័យ UNFPA ក៏បានគាំទ្រក្រសួងផែនការផងដែរ លើការងាររៀបចំផែនការយុទ្ធសាស្ត្រអភិវឌ្ឍន៍ជាតិ, ការរៀបចំ និងផ្សព្វផ្សាយក្របខណ្ឌគោលដៅអភិវឌ្ឍប្រកបដោយចីរភាព ២០១៦-២០៣០, បញ្ជីកែសម្រួល បញ្ជីចំនុចដៅ សូចនាករ និងតម្លៃចំណុចដៅ គ.អ.ច.ក. និងរបាយការណ៍ត្រួតពិនិត្យថ្នាក់ជាតិដោយស្ម័គ្រចិត្ត។ ចំពោះគោលនយោបាយជាតិប្រជាជន ២០១៦-២០៣០ ជាពិសេសការតាមដានការអនុវត្តកម្មវិធីសកម្មភាពនៃសន្និសីទអន្តរជាតិស្តីពីប្រជាជននិងអភិវឌ្ឍន៍ UNFPA បានដើរតួនាទីយ៉ាងសំខាន់ និងបានគាំទ្រយ៉ាងពេញទំហឹង ដោយបានជំរុញការប្តេជ្ញាចិត្តដោយស្ម័គ្រចិត្តរបស់កម្ពុជា ក្នុងថ្នាក់ជាតិ ទៅថ្នាក់តំបន់ និងថ្នាក់កម្រិតពិភពលោក សម្រេច និងបានប្រែក្លាយមុខមាត់ដ៏ត្រចះត្រចង់របស់កម្ពុជា រះឡើងលើឆាកអន្តរជាតិ។

ជាមួយសមិទ្ធផលសំខាន់ៗជាច្រើន ក្រោមកិច្ចសហប្រតិបត្តិការរវាងក្រសួងផែនការ និង អង្គការ UNFPA ក្នុងឱកាសជំនួបសម្តែងការគួរសមនេះ ឯកឧត្តមរដ្ឋមន្ត្រី បានស្នើដល់លោកស្រី តំណាង UNFPA ពិនិត្យលទ្ធភាព គាំទ្រ កៀរគរធនធាន និងដៃគូ (UN Families) ដើម្បីបង្កើនកិច្ចសហប្រតិបត្តិការទ្វេដងថែមទៀត ដើម្បីសម្រេចឱ្យបានលទ្ធផលថ្មីៗបន្ថែមទៀត ជាពិសេសសម្រេចឱ្យបានក្នុងក្របខណ្ឌអភិវឌ្ឍប្រកបដោយចីរភាព(SDGs, CSDGs) ឆ្នាំ២០៣០ ព្រមទាំងកម្មវិធីសកម្មភាពនៃសន្និសីទអន្តរជាតិស្តីពីប្រជាជននិងអភិវឌ្ឍន៍(ICPD)ផងដែរ។

ថ្លែងក្នុងជំនួប លោកស្រី តំណាងUNFPA បានលើកឡើងថា UNFPA បាននិងកំពុងសហការយ៉ាងសកម្មជាមួយរាជរដ្ឋាភិបាលកម្ពុជា និងក្រសួងផែនការអស់រយៈពេលជិត៣ទសវត្សរ៍មកហើយ។ លោកស្រីបន្តថា ក្នុងភាពជាដៃគូ UNFPAបានផ្តល់ការអភិវឌ្ឍយ៉ាងសំខាន់នៅក្នុងការបង្កើតទិន្នន័យប្រជាជន ផ្អែកលើភស្តុតាង និងធ្វើឱ្យប្រសើរឡើងភ្លាមៗសម្រាប់ការធ្វើគោលនយោបាយ និងការអភិវឌ្ឍផែនការ និងគោលនយោបាយជាតិ។ លោកស្រីបន្ថែមថា ទាំងនេះ បានចូលរួមចំណែកក្នុងការត្រួតពិនិត្យ និងតាមដានវឌ្ឍនភាពនៃគោលនយោបាយ និងផែនការជាតិ ជាពិសេសក្នុងការរាយការណ៍ពីរបៀបវារៈ MDGs និង ICPD ដែលកម្ពុជាទទួលបានការទទួលស្គាល់ជាអន្តរជាតិ។

មុននឹងបញ្ចប់កិច្ចជំនួប លោកស្រី បានថ្លែងអំណរគុណឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ ដែលបានអនុញ្ញាតឱ្យលោកស្រី និងសហការី បានចូលជួបសម្តែងការគួរសម និងពិភាក្សាការងារនាពេលនេះ លោកស្រីសន្យាថា UNFPA នៅតែបន្តគាំទ្រក្រសួងផែនការ លើកិច្ចសហប្រតិបត្តិការដែលបានអនុវត្តរួមគ្នា នឹងសន្យាពិនិត្យមើលលទ្ធភាពបន្ថែមទៀត ផ្អែកតាមកម្មវិធីប្រចាំប្រទេសរបស់ UNFPA សម្រាប់រយៈពេល ២០២៤-២០២៨ ជាពិសេសការធ្វើឱ្យកាន់តែប្រសើរឡើងនូវប្រភពទិន្នន័យដែលច្បាស់លាស់ និងគួរឱ្យទុកចិត្តបាន ៕