មន្រ្តីនគរបាលចរាចរម្នាក់ ដែលបើកបរម៉ូតូល្មើសច្បាប់អត់ពាក់មួកសុវត្ថិភាព និងនិយាយទូរស័ព្ទ ត្រូវបានកោះហៅចូលមកផាកពិន័យតាមច្បាប់

ភ្នំពេញ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឱ្យដឹងថា កាលពីព្រឹកថ្ងៃទី១៩ ខែមករា ឆ្នាំ២០២៤ បន្ទាប់ពីបានឃើញការផ្សព្វផ្សាយព័ត៌មានផុសនៅលើបណ្តាញសង្គមទៅលើករណីមន្រ្តីនគរបាលចរាចរម្នាក់បើកបរម៉ូតូលើដងផ្លូវសាធារណៈនៅក្នុងខណ្ឌពោធិ៍សែនជ័យ មិនពាក់មួកសុវត្ថិភាព និងនិយាយទូរស័ព្ទ។

ភ្លាមនោះ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យលោកនាយការិយាល័យនគរបាលចរាចរណ៍ផ្លូវគោក ស្រាវជ្រាវរកមន្រ្តីបើកបរល្មើសច្បាប់ចរាចរណ៍ដើម្បីឱ្យចូលមកផាកពិន័យតាមច្បាប់។

លោកអនុសេនីយ៍ឯក ព្រាប តារា មន្ត្រីនគរបាលចរាចរណ៍ ហើយនៅថ្ងៃដដែលត្រូវបានចូលមកអង្គភាពការិយាល័យនគរបាលចរាចរណ៍ផ្លូវគោក ដើម្បីផាកពិន័យតាមច្បាប់ទី១,មិនពាក់មួកសុវត្ថិភាព ចំនួន៦០,០០០រៀល និងទី២,ប្រើប្រាស់ទូរស័ព្ទពេលបើកបរ ចំនួន៨០,០០០រៀល៕