អភិបាលរងខេត្តក្រចេះ ស្នើមន្ទីរមុខងារសាធារណៈ សហការជាមួយមន្ទីរអប់រំ រៀបចំវគ្គបណ្ដុះបណ្ដាលបន្ថែមដល់ រដ្ឋបាលស្រុកឆ្លូងអំពីនីតិវិធីគ្រប់គ្រងបុគ្គលិក

ភ្នំពេញ៖ លោកគ្រូ-អ្នកគ្រូចំនួន៣០៥នាក់ ដែលបម្រើការងារនៅតាមគ្រឹះស្ថានមត្តេយ្យសិក្សា បឋមសិក្សា និងមជ្ឈមណ្ឌលសិក្សាសហគមន៍ នៅក្នុងស្រុកឆ្លូង ខេត្តក្រចេះ ត្រូវបានក្រសួងអប់រំយុវជន និងកីឡាខេត្ត ផ្ទេរបញ្ជូលទៅក្នុងរចនាសម្ព័ន្ធរបស់រដ្ឋបាលស្រុក តាមអនុក្រឹត្យលេខ ២១៣ អនក្រ.បក ចុះថ្ងៃទី២៨ ខែកក្កដា ឆ្នាំ២០២៣ របស់រាជរដ្ឋាភិបាលកម្ពុជា និងប្រកាសលេខ ១០៦៥ អយក.ប្រក ចុះថ្ងៃទី១ ខែវិច្ឆិកា ឆ្នាំ២០២៣ របស់ក្រសួងអប់រំ យុវជន និងកីឡា ក្រោមអធិបតីភាព ឯកឧត្តម ហង់ ចាន់ឌី អភិបាលរងខេត្តក្រចេះ តំណាងឯកឧត្តម វ៉ា ថន អភិបាលខេត្ត និងដោយមានការចូលរួមពីលោកប្រធានមន្ទីរអប់រំ យុវជន និងកីឡាខេត្ត លោកប្រធានមន្ទីរមុខងារសាធារណៈ លោកលោកស្រីអភិបាល អភិបាលរងស្រុកឆ្លូង និងកម្លាំងទាំងបីរប្រភេទផងដែរ ដែលប្រព្រឹត្តទៅនៅថ្ងៃសុក្រ ៩កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៩ ខែមករា ឆ្នាំ២០២៤ នៅសាលប្រជុំវិទ្យាល័យ សិលាវេទី គាត ឈន់។

ឯកឧត្តម ហង់ ចាន់ឌី អភិបាលរងខេត្ត មានប្រសាសន៍គូសបញ្ជាក់ថា នេះគឺជារបត់ថ្មីនៃកំណែទម្រង់រដ្ឋបាលសាធារណៈ របស់រាជរដ្ឋាភិបាលកម្ពុជា នីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានដាក់ចេញនូវគោលនយោបាយយុទ្ធសាស្រ្តបញ្ចកោណដំណាក់កាលទី១ ដោយកំណត់យកអាទិភាពគន្លឹះ ៥គឺ មនុស្ស, ផ្លូវ, ទឹក, ភ្លើង និងបច្ចេកវិទ្យា។ ហើយការផ្ទេរមុខងារ ធនធាន និងការគ្រប់គ្រងចាត់ចែងលើវិស័យអប់រំ និងផ្នែកនេះ មកឲ្យរដ្ឋបាលស្រុកដែលរាជរដ្ឋាភិបាលចាត់ទុកថា ជារដ្ឋបាលមូលដ្ឋាននៅកៀកជិតប្រជាពលរដ្ឋ និងមានលក្ខណៈសម្បត្តិសមស្របបំផុតសម្រាប់គ្រប់គ្រងចាត់ចែង និងអនុវត្តមុខងារអប់រំ យុវជន និងកីឡាក្នុងកម្រិតបឋមសិក្សាចុះក្រោមប្រកបដោយប្រសិទ្ធភាព គុណភាព ស្របតាមគោលនយោបាយច្បាប់ លិខិតបទដ្ឋានគតិយុត្ត កម្មវិធីសិក្សា និងស្ដង់ដាសេវាអប់រំដែលកំណត់ដោយក្រសួងអប់រំ យុវជន និងកីឡា។

ឯកឧត្តមអភិបាលរងខេត្ត ក៏បានស្នើសុំឲ្យមន្ទីរមុខងារសាធារណៈ សហការជាមួយមន្ទីរអប់រំ យុវជន និងកីឡា រៀបចំនូវវគ្គបណ្ដុះបណ្ដាលបន្ថែមដល់ រដ្ឋបាលស្រុក អំពីនីតិវិធីគ្រប់គ្រងបុគ្គលិក បន្ទាប់ពីដំណើរការផ្ទេរនេះ-ក្រុមប្រឹក្សានិងរដ្ឋបាលស្រុក ត្រូវផ្ដោតការយកចិត្តទុកដាក់ ប្រកបដោយស្មារតីទទួលខុសត្រូវខ្ពស់ក្នុងភាពជាម្ចាស់លើការដឹកនាំ ការគ្រប់គ្រងការចាត់ចែង និងការអនុវត្តមុខងារអប់រំ យុវជន និងកីឡាដែលបានប្រគល់ ៕