ប្រធានគណៈមេធាវីកម្ពុជា ដឹកនាំគណៈប្រតិភូ ចូលរួមក្នុងពិធីបើកឆ្នាំគតិយុត្ត ២០២៤ របស់ហុងកុង

ភ្នំពេញ៖ នាថ្ងៃចន្ទ ១២កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២២ ខែមករា ឆ្នាំ២០២៤ ឯកឧត្តម លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា​ បានអញ្ជេីញដឹកនាំគណៈប្រតិភូគណៈមេធាវីចូលរួមក្នុងពិធី “បើកឆ្នាំគតិយុត្ត ២០២៤ របស់ហុងកុង” (Ceremonial Opening of the Legal Year 2024 Hong Kong)​នៅសាលាក្រុងហុងកុង។

នៅក្នុងពិធីនេះ​ ក៏មានពិធីត្រួតពល​រៀបចំដោយនគរបាលហុងកុងនៅ Edinburg Place​ ដោយលោកចៅក្រម Chief Justice Adrew Cheung Kui-nung ប្រធានតុលាការឧទ្ធរណ៍។ នឹងមានការចូលរួមថ្លែងសុន្ទរកថាដោយលោក Paul Lam SC រដ្ឋមន្រ្តីយុត្តិធម៌ លោក Victor Dawes SC ប្រធានគណៈមេធាវីហុងកុង និងលោក Chan Chak-Ming ប្រធានសហគមន៍អ្នកច្បាប់ហុងកុង។

សូមបញ្ជាក់ផងដែរថា​ ពិធីបេីកឆ្នាំគតិយុត្តិនេះ​ គឺជាការចាប់ផ្តើមការងារផ្លូវការរបស់ចៅក្រមសម្រាប់រយៈពេលមួយឆ្នាំៗ​ និងជាពិធីប្រពៃណីរបស់បណ្តាប្រទេសប្រើប្រាស់ប្រព័ន្ធច្បាប់ខំមិនឡ ដូចជាចក្រភពអង់គ្លេស អូស្ត្រាលី និងញូវហ្សេលិនផងដែរ។

ការចូលរួមក្នុងពិធីប្រចាំឆ្នាំនេះ ក៏ជាឱកាសសម្រាប់ថ្នាក់ដឹកនាំតាមបណ្តាគណៈមេធាវីពីជុំវិញពិភពលោកជួបជុំគ្នា ពិភាក្សា ចែករំលែកបទពិសោធន៍ និងវឌ្ឍនភាពថ្មីៗតាមយុត្តាធិការរបស់ខ្លួន ព្រមទាំងរឹតចំណងមិត្តភាពនៅក្នុងសហគមអន្តរជាតិរបស់អ្នកច្បាប់ផងដែរ។

ពិធីនេះ មានការចូលរួមពីបណ្តាថ្នាក់ដឹកនាំ និងគណៈប្រតិភូពីបណ្តាគណៈមេធាវីទូទាំងពិភពលោកប្រមាណ ៣៨គណៈមេធាវី ៕