នាយករដ្ឋមន្ត្រី ហ៊ុន ម៉ាណែត៖ រយៈពេល៥ខែនេះ ខ្ញុំបានធ្វើការច្រើន ដោះស្រាយបញ្ហាជាច្រើន គឺតាមរយៈការទទួលបានព័ត៌មាន តាមប្រព័ន្ធផ្សព្វផ្សាយសង្គម

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ក្នុងរយៈពេល៥ខែ សម្តេចបានធ្វើការដោះស្រាយបញ្ហាជាច្រើន តាមរយៈការទទួល បានព័ត៌មានពីប្រព័ន្ធផ្សព្វផ្សាយសង្គម ។

ក្នុងឱកាសបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងព័ត៌មាន នារសៀលថ្ងៃទី២៣ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បញ្ជាក់ថា «ក្នុងរយៈពេល៥ខែនេះ រដ្ឋាភិបាលបាន៥ខែ ១ថ្ងៃគត់ ខ្ញុំបានធ្វើការច្រើន ដោះស្រាយបញ្ហាជាច្រើន គឺតាមរយៈការទទួលបានព័ត៌មានតាមប្រព័ន្ធផ្សព្វផ្សាយសង្គម ខ្ញុំដោះផ្ទាល់ ហើយខ្ញុំបញ្ជូនទៅឱ្យស្ថានប័ន អាជ្ញាធរថ្នាក់ក្រោមជាតិចាត់វិធានការដោយស្រាយផ្ទាល់ភ្លាមៗ»។

សម្តេចធិបតី ថ្លែងថា ជាការពិតណាស់ព័ត៌មានទាំងអស់ ដែលធ្វើការផ្សព្វផ្សាយតាមបណ្តាញសង្គម មិនមែនសុទ្ធតែព័ត៌មានគ្រប់ជ្រុងជ្រោយ និងពិតទាំងអស់នោះទេ ប៉ុន្តែយើងអាចយកព័ត៌មានណា ដែលយើងអាចធ្វើការស្រាវជ្រាវចាត់វិធានការផ្ទាល់បាន។

សម្តេចធិបតី បន្ថែមថា ការយកព័ត៌មានពីប្រព័ន្ធផ្សព្វផ្សាយសង្គមមកធ្វើការដោះស្រាយនេះ ដើម្បីពន្លត់រឿងតូច កុំឱ្យក្លាយទៅជារឿងធំ ដែលនេះគឺជាមធ្យោបាយធំណាស់ ដែលកន្លងទៅអាជ្ញាធរថ្នាក់ ក្រោមជាតិ ក៏បានប្រើវិធីសាស្ត្រនេះ ដើម្បីក្តាប់ព័ត៌មានឱ្យទាន់សភាពការផងដែរ ៕