លេខាធិការដ្ឋាន គ.ស.ព.ស ច្រានចោលព័ត៌មានក្លែងក្លាយដែលឲ្យប្រជាពលរដ្ឋចុច Link ដើម្បីទទួលបានអំណោយ ១៥០០ដុល្លារ ពីបារាំង
ភ្នំពេញ៖ លេខាធិការដ្ឋាន នៃគណៈកម្មាធិការជាតិ សម្របសម្រួលព័ត៌មាន និងសាធារណៈមតិ (គ.ស.ព.ស) នៅថ្ងៃទី២៤ ខែមករា ឆ្នាំ២០២៤នេះ បានចេញមកច្រានចោលព័ត៌មានក្លែងក្លាយ ដែលកំពុងចែកចាយនៅតាមបណ្ដាញសង្គម ដោយតម្រូវឲ្យប្រជាពលរដ្ឋចុចលើតំណភ្ជាប់ (Link) ដើម្បីឱកាសទទួលបានអំណោយចំនួន១៥០០ដុល្លារ។
លេខាធិការដ្ឋាន នៃគណៈកម្មាធិការជាតិ សម្របសម្រួលព័ត៌មាន និងសាធារណៈមតិ បានបញ្ជាក់ថា «ករណីនេះជាព័ត៌មានក្លែងក្លាយ មិនមានករណីចុះឈ្មោះដើ ម្បីទទួលបានអំណោយជាថវិកា ពីប្រទេសបារាំងដូចជាការបង្ហោះខាងលើនោះទេ។
សូមបងប្អូនប្រជាពលរដ្ឋកុំមានការយល់ច្រលំ និងសូមកុំចុចលើលីងនោះឱ្យសោះ»។
ជាមួយគ្នានេះ ក្រុមការងារ Hotline Scam 24/7 នៃអគ្គស្នងការដ្ឋាននគរបាលជាតិ ក៏បានអះអាងថា ប្រសិនបើប្រជាពលរដ្ឋចុចតំណភ្ជាប់ដែលបញ្ជូនដោយជនអនាមិកនោះ នឹងប្រើប្រាស់ដើម្បីទាញយកទិន្នន័យផ្ទាល់ខ្លួនរបស់ជនរងគ្រោះតែម្ដង។ ដូច្នេះសូមកុំចុចនូវអ្វីដែលទទួលបានពីជនអនាមិក ដើម្បីជៀសវាងបាត់បង់ទិន្នន័យ ឬឯកសារសំខាន់ផ្សេងៗ៕
