ក្រសួងរ៉ែ បើកសិក្ខាសាលាអំពីវឌ្ឍនភាព នៃការរៀបចំ តាក់តែងសេចក្តីព្រាងសារាចរស្ដីពីសុវត្ថិភាព និងសុខភាពសម្រាប់ប្រតិបត្តិការ អាជីវកម្មអណ្ដូងរ៉ែបើក

ភ្នំពេញ៖ នៅថ្ងៃទី២៥ ខែមករា ឆ្នាំ២០២៤ ក្រសួងរ៉ែ និងថាមពល បានបើកសិក្ខាសាលា អំពីវឌ្ឍនភាព នៃការរៀបចំតាក់តែងសេចក្តីព្រាងសារាចរ ស្ដីពីសុវត្ថិភាព និងសុខភាពសម្រាប់ប្រតិបត្តិការ អាជីវកម្មអណ្ដូងរ៉ែបើក ក្រោមអធិបតីភាពឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល។

ឯកឧត្តម អ៉ឹង ឌីប៉ូឡា អគ្គនាយក នៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានលើកឡើងថា វិស័យរ៉ែ បានដើរតួនាទី ក្នុងការចូលរួមចំណែកសម្រាប់ការអភិវឌ្ឍសេដ្ឋកិច្ចជាតិ ចូលរួមអភិវឌ្ឍសហគមន៍ មូលដ្ឋានកាត់បន្ថយភាពក្រីក្រដោយផ្ដល់ការងារ ជូនប្រជាពលរដ្ឋក្នុងតំបន់ និងបានបង្កើនចំណូលជាតិ តាមរយៈការបង់សួយសារ និងពន្ធអាករផ្សេងៗទៀត។ ឯកឧត្តម អគ្គនាយក បានឲ្យដឹងថា ទន្ទឹមនឹងមានការកើនឡើង នូវតម្រូវការប្រើប្រាស់ធនធានរ៉ែ ការដ្ឋានអណ្ដូងរ៉ែបើក ក៏មានការកើនឡើងគួរជាទីកត់សំគាល់។

ឯកឧត្តមអគ្គនាយក បានបន្តថា ប្រការនេះ ទាមទារឲ្យមាននូវគោលការណ៍សុវត្ថិភាព និងសុខភាពជាមូលដ្ឋានចាំបាច់ សម្រាប់សម្បទានិក ដែលធ្វើប្រតិបត្តិការធនធានរ៉ែ អាជីវកម្មអណ្ដូងរ៉ែបើកទាំងអស់អនុវត្ត និងប្រតិបត្តិឲ្យបានហ្មត់ចត់ ដើម្បីបង្ការទប់ស្កាត់ហានិភ័យនានា ដែលអាចកើតមានជាយថាហេតុ ក្នុងការដ្ឋានអណ្ដូងរ៉ែបើក។
ដើម្បីឆ្លើយតបទៅនឹងបញ្ហាប្រឈមនេះ ក្រសួងរ៉ែ និងថាមពល បានចាប់ផ្ដើមរៀបចំតាក់តែងសេចក្តីព្រាងសារាចរ ស្ដីពីសុវត្ថិភាព និងសុខភាពសម្រាប់ប្រតិបត្តិការអាជីវកម្មអណ្ដូងរ៉ែបើកឡើង កាលពីចុងឆ្នាំ២០២១ រហូតមកដល់បច្ចុប្បន្ន ដើម្បីជំរុញឲ្យការធ្វើប្រតិបត្តិការអាជីវកម្មរ៉ែស្របតាមបទដ្ឋានបច្ចេកទេស ទប់ស្កាត់គ្រោះថ្នាក់ក្នុងការដ្ឋាន ធានាសុខុមាលភាពអ្នកបំពេញការងារក្នុងការដ្ឋាន កាត់បន្ថយផលប៉ះពាល់ជាអតិបរមាលើបរិស្ថាននិងសង្គម និងធានាការស្តារការដ្ឋានឡើងវិញឱ្យបានត្រឹមត្រូវ ក្រោយបញ្ចប់អាជីវកម្ម។

បើតាមឯកឧត្តម អ៉ឹង ឌីប៉ូឡា, ក្រុមការងារក្រសួងរ៉ែ និងថាមពល បានរៀបចំកិច្ចប្រជុំពិនិត្យនិងពិភាក្សាកម្រិតបច្ចេកទេសនិងកម្រិតថ្នាក់ដឹកនាំជាច្រើនលើកច្រើនសារ និងបានចុះទស្សកិច្ចសិក្សាអំពីការអនុវត្តផ្ទាល់ នៅតាមការដ្ឋានធ្វើប្រតិបត្តិការអាជីវកម្មអណ្ដូងរ៉ែដើម្បីជាធាតុចូលក្នុងការរៀបចំសេចក្ដីព្រាងសារាចរនេះ បានចំនួន ៣ខេត្ត ដែលក្នុងនោះមានខេត្តកំពត (ការដ្ឋានថ្មកំបោររបស់រោងចក្រស៊ីម៉ងត៍ Kampot Cement និងការដ្ឋានថ្មកំបោររបស់រោងចក្រ Chip Mong Insee Cement ព្រមទាំងការដ្ឋានផលិតថ្មមួយការដ្ឋាន) ខេត្តក្រចេះ (ការដ្ឋានថ្មអារនៅតំបន់ស្វាយជ្រះ ស្រុកស្នួល) និងខេត្តមណ្ឌលគិរី (ការដ្ឋានអណ្ដូងរ៉ែបើករបស់ក្រុមហ៊ុន Renaissance Minerals (Cambodia) Limited)។

ក្រុមការងារបានផ្តោតលើចំណុចសំខាន់ៗពាក់ព័ន្ធនឹងសុវត្ថិភាព និងលក្ខខណ្ឌលិខិតអនុញ្ញាតនៃការកំណត់ពីបរិមាណគ្រឿងផ្ទុះដែលត្រូវប្រើប្រាស់សម្រាប់ប្រតិបត្តិការធនធានរ៉ែ និងកាតព្វកិច្ចរបស់និយោជិតរ៉ែ ពាក់ព័ន្ធនឹងរចនាសម្ព័ន្ធគ្រប់គ្រងនៅក្នុងការដ្ឋានអណ្ដូងរ៉ែបើក ដើម្បីធានាការរក្សាសុខភាព និងសុវត្ថិភាពរបស់កម្មករនិយោជិត មនុស្ស និងសត្វនៅក្នុងការដ្ឋានអណ្ដូងរ៉ែបើក និងនៅតំបន់ជុំវិញការដ្ឋាន។

សេចក្ដីព្រាងសារាចរនេះមាន ១៧ចំណុចសំខាន់ៗ ដែលចែងអំពី៖ ១-វិធានការការពារគ្រោះថ្នាក់ និងហានិភ័យ ២-សិទ្ធិនិងការទទួលខុសត្រូវរបស់និយោជិតរ៉ែ និងគណៈគ្រប់គ្រងសុវត្ថិភាព
៣-លើកកម្ពស់ការការពារសុវត្ថិភាព ៤-អប់រំនិងបណ្ដុះបណ្ដាលសមត្ថភាព ៥-ការការពារគ្រោះថ្នាក់នៅទីតាំងអណ្ដូងរ៉ែបើក ៦-ការទប់ស្កាត់ការបំពុល ៧-ការគ្រប់គ្រងនិងប្រើប្រាស់សារធាតុគីមី ៨-ការទប់ស្កាត់គ្រោះថ្នាក់បណ្ដាលមកពីចរន្ដអគ្គិសនី ៩-ការការពារគ្រោះថ្នាក់ចំពោះសារធាតុផ្ទុះនិងគ្រឿងបំផ្ទុះ និងការបំផ្ទុះ ១០-ប្រតិបត្តិការខួងរណ្ដៅបំផ្ទុះ ១១-ការកាយយក ការលើកដាក់ និងការដឹកជញ្ជូនរ៉ែ ១២-វិធានសុវត្ថិភាពក្នុងការបើកបរក្នុងការដ្ឋានអណ្ដូងរ៉ែបើក ១៣-ហេដ្ឋារចនាសម្ព័ន្ធផ្លូវក្នុងការដ្ឋានអណ្ដូងរ៉ែបើក ១៤-ការដឹកជញ្ជូនរ៉ែ ១៥-សុខុមាលភាពនៅការដ្ឋានអណ្ដូងរ៉ែបើក ១៦-ការសង្គ្រោះបឋម
១៧-ការបិទនិងការស្ដារនីតិសម្បទាការដ្ឋានអណ្ដូងរ៉ែបើក ៕