អភិបាលខេត្តកំពង់ធំ ដឹកនាំកម្លាំងចម្រុះចុះពិនិត្យមើលស្ថានភាពដែលរំលោភដីរដ្ឋ ក្នុងតំបន់ហាមឃាត់ (តំបន់បី) នៅសង្កាត់ស្រយ៉ូវ

ភ្នំពេញ៖ មួយរយៈពេលនេះ ដោយសង្កេតឃើញជនខិលខូចមួយចំនួន បាននាំគ្នាមករំលោភដីរដ្ឋ យកធ្វើស្រូវប្រាំងនៅដីតំបន់បី ដែលជាតំបន់ហាមឃាត់ មិនគោរពទៅតាមគោលលការណ៍របស់រាជរដ្ឋាភិបាលកម្ពុជា ដោយមិនអនុញាតិឱ្យអាស្រ័យផលទេនៅលើដី ឬជីកប្រឡាយយកទឹកមកស្រោចស្រពនៅលើស្រូវប្រាំងនោះទេ ដើម្បីចង់ដឹងពីជនខិលខូច ដែលរំលោភបំពានទៅលើដីរដ្ឋ យកធ្វើជាកម្មសិទ្ធិរបស់ខ្លួន។

ជាក់ស្តែងនារសៀលថ្ងៃទី២៥ ខែមករា ឆ្នាំ២០២៤ ឯកឧត្តម ងួន រតនៈ អភិបាលខេត្តកំពង់ធំ បានដឹកនាំកម្លាំងជំនាញចម្រុះ ចុះពិនិត្យទីតាំងដីនៅតំបន់បី ដែលជនខិលខូចកំពុងតែរំលោភបំពានដីរដ្ឋ ធ្វើស្រែប្រាំងចំនួន ១៦៣ហិចតា ៧២អា ស្ថិតនៅតំបន់គោកព្រះ តំបន់ខ្ទុមមួយដើម និងតំបន់ស្នែងក្របី នៅសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។

ជាមួយគ្នានេះ ឯកឧត្តម ងួន រតនៈ បានដាក់បទបញ្ជាទៅលើកងកម្លាំងទាំងបី និងអាជ្ញាធរពាក់ព័ន្ធទាំងអស់ ឱ្យចុះតាមដានសកម្មភាពរបស់ជនខិលខូចដែលមកធ្វើស្រូវប្រាំងនៅតំបន់ហាមឃាត់នេះ ដើម្បីស្វែងរកជនល្មើស អនុវត្តនីតិវិធីតាមផ្លូវច្បាប់។ ជាក់ស្ដែង ដីស្រែដែលកំពុងតែអាស្រ័យផល នៅដីតំបន់ហាមឃាត់នេះ កំពុងតែមានជនខលខូច មករុករានទន្ទ្រានបំពានដីជាកម្មសិទ្ធិផ្ទាល់ខ្លួន។

គួរបញ្ជាក់ផងដែរថា ផ្ទៃដីដែលជនខិលខូចកំពុងតែទន្ទ្រានរំលោភបំពានដីរដ្ឋ មកធ្វើជាកម្មសិទ្ធិមានចំនួនចំនួន ១៦៣ហិចតា ៧២អា ជីកប្រឡាយផ្ដាច់ផ្លូវ ដើម្បីយកទឹកទៅស្រោចស្របនៅស្រែប្រាំងរបស់ខ្លួន ៕