ប្រធានក្រុមការងារចុះជួយខេត្តកំពង់ចាម ផ្ដាំផ្ញើដល់អង្គបោះឆ្នោតទាំងអស់ថែរក្សាសុខភាព ត្រៀមខ្លួននិងឯកសារ ដើម្បីចូលរួមបោះឆ្នោតជ្រើសតាំងសមាជិកព្រឹទ្ធសភា

ភ្នំពេញ៖ ឯកឧត្ដមឧបនាយករដ្ឋមន្ត្រី នេត សាវឿន និងជាប្រធានក្រុមការងារគណបក្សប្រជាជនកម្ពុជាចុះជួយខេត្តកំពង់ចាម បានផ្ដាំផ្ញើដល់អង្គបោះឆ្នោតទាំងអស់ ឲ្យថែរក្សាសុខភាព ត្រៀមខ្លួន ត្រៀមឯកសារ ដើម្បីចូលរួមបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឲ្យបានគ្រប់ៗគ្នា។

ក្នុងពិធីសំណេះសំណាលជាមួយអង្គបោះឆ្នោត និងប្រកាសសមាសភាពបេក្ខជនឈរឈ្មោះបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ នៅមណ្ឌលភូមិភាគទី២ នារសៀលថ្ងៃទី ២៧ ខែមករាឆ្នាំ ២០២៤នេះ នៅស្នាក់ការគណបក្សប្រជាជនកម្ពុជា ស្រុកចំការលើ ឧបនាយករដ្ឋមន្ដ្រី នេត សាវឿន បានណែនាំឲ្យអាជ្ញាធរគ្រប់លំដាប់ថ្នាក់ក្នុងខេត្ត កែប្រែឥរិយាបថ និងចំណុចដែលខ្វះខាត ពោលគឺធ្វើខ្លួនឲ្យល្អ ដើម្បីធ្វើដំណើរលើឃឿនលទ្ធិប្រជាធិបតេយ្យ ឲ្យទទួលបានជ័យជម្នះនេះ។

សូមបញ្ជាក់ថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ៕