ប្រធានមន្ទីរ៖ ក្នុងខេត្តកំពង់ស្ពឺមានអាងទឹកទាំងធំទាំងតូចចំនួន៣៧៥

ភ្នំពេញ៖ លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ បានឲ្យដឹងថា ក្នុងខេត្តកំពង់ស្ពឺមានអាងទឹកទាំងធំទាំងតូចចំនួន៣៧៥ ស្ថិតក្នុងសារពើភ័ណ្ឌរបស់មន្ទីរ ក្នុងនោះក៏មានខ្នាតធំចំនួន៦ និងខ្នាតមធ្យមចំនួន១៧ ហើយយើងបានធ្វើបច្ចុប្បន្នភាពទាំងធំទាំងតូចរួចក្នុងរង្វង់១៦៤ប្រព័ន្ធ ក្នុងនោះយើងមានអាងទឹកដែលធានាទៅលើការផ្គត់ផ្គង់គឺអាងទឹកទំនប់ត្រសាល់ ដែលជាអំណោយរបស់ភាគីឥណ្ឌា សាងសង់រួចក្នុងឆ្នាំ២០១៥ ហើយយើងបានប្រើប្រាស់ទឹកនេះរយៈពេល៨ឆ្នាំមិនដែលជួបការលំបាកនោះទេ។

ក្នុងកិច្ចសម្ភាសន៍ជាមួយអង្គភាពសារព័ត៌មាន Hotnews Asia លោក ញ៉ាញ់ ជាបហ៊ង បានបញ្ជាក់ថា “ទន្ទឹមនឹងនេះយើងក៏មានអាងទឹកអន្លង់ជ្រៃ អាងទឹកពាមល្វាអូរតោង អាងទឹកចាន់ថ្នាល អាងទឹកពោកគ្រួស ដែលស្ថិតនៅក្នុងភូមិសាស្ត្រស្រុកបរសេដ្ឋ អាងទឹកទំនប់ស្វាយ អាងទឹកអូរត្រែង អាងទឹកសន្ដែរកាច ដែលបានជួយផ្គត់ផ្គង់ និងបំពេញសេចក្តីត្រូវការរបស់បងប្អូនប្រជាកសិករយើងនៅក្នុងតំបន់ និងនៅខេត្ដដទៃ”។

លោកប្រធានមន្ទីរធនធានទឹក និងឧតុនិយមខេត្តកំពង់ស្ពឺ បានឲ្យដឹងទៀតថា ទន្ទឹមនឹងនេះដែរយើងក៏មានគម្រោងមួយទៀតដែរគឺកិច្ចសហប្រតិបត្តិការអន្តរជាតិ ជាមួយដៃគូអភិវឌ្ឍន៍គឺសមភាគីជប៉ុន ដែលហៅថា JICA ដែលកំពុងអភិវឌ្ឍន៍ទៅលើស្ទឹងព្រែកត្នោត គឺមានប្រឡាយមេខាងត្បូងខាងជើង និងទ្វារទឹករលាំងជ្រៃ ហើយមកដល់ពេលនេះកំពុងអនុវត្តជាបណ្តើរៗ៕