យប់ថ្ងៃទី៤ នៃការរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល សមត្ថកិច្ចឃាត់យានយន្តល្មើស ១៥៨គ្រឿង

ភ្នំពេញ៖ លោកវរសេនីយ៍ឯក សំ វិច្ឆិកា អ្នកនាំពាក្យស្នងការនគរបាលរាជធានីភ្នំពេញ បានឱ្យដឹងថា នៅយប់ថ្ងៃទី៣ គឺយប់ថ្ងៃទី២៧ ខែមករា ឆ្នាំ២០២៤នេះ ការអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល សមត្ថកិច្ចឃាត់យានយន្តល្មើស ចំនួន១៥៨គ្រឿង ក្នុងនោះរថយន្ត ចំនួន៣៤រឿង និងម៉ូតូ ចំនួន១២៤គ្រឿង។

លោកបន្តថា ការរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុលនេះ ធ្វើឡើងដោយអនុវត្តតាមបទបញ្ជាផ្ទាល់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការដឹកនាំត្រួតពិនិត្យអនុវត្តផ្ទាល់ពី ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ។

លោកវរសេនីយ៍ឯក សំ វិច្ឆិកា បានបញ្ជាក់ថា “នៅយប់ថ្ងៃទី២៨ ខែមករា ឆ្នាំ២០២៤ តាមបណ្តាអធិការដ្ឋាននគរបាលខណ្ឌ បានចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល ឃាត់យានយន្តល្មើស ចំនួន១៥៨គ្រឿង (រថយន្ត ចំនួន៣៤គ្រឿង, ម៉ូតូ ចំនួន១២៤គ្រឿង) ដែលក្នុងមាន ល្មើសជាតិស្រវឹង ចំនួន៤៣គ្រឿង កម្រិត ០.២៥ – ០.៣៩ mg/L ចំនួន១៨គ្រឿង អ្នកបើកបរម៉ូតូ ចំនួន០៧នាក់ អ្នកបើកបររថយន្ត ចំនួន១១នាក់ ដោយឡែក កម្រិត ០.៤០ mg/L ឡើង ចំនួន២៥គ្រឿងមានអ្នកបើកបរម៉ូតូ ចំនួន១០នាក់ និងអ្នកបើកបររថយន្ត ចំនួន១៥នាក់ចំពោះបទល្មើសផ្សេងៗ ចំនួន ១១៥គ្រឿង ក្នុងនោះអ្នកអត់មួកសុវត្ថិភាព ចំនួន១០៣គ្រឿង, ម៉ូតូគ្មានប័ណ្ណបើកបរចំនួន ០២គ្រឿង, ឡានគ្មានប័ណ្ណបើកបរចំនួន ០៨គ្រឿង និងអ្នកបើកបរម៉ូតូមានសារធាតុញៀនចំនួន ០២គ្រឿង។ ដោយឡែក វិធានការអប់រំ បានអប់រំអ្នកបើកបរមានជាតិអាល់កុលក្រោម ០.២៥ mg/L ចំនួន២០នាក់ និងអប់រំអ្នកបើកបរមិនពាក់មួកសុវត្ថិភាព ចំនួន១០នាក់ (មានមួក មិនព្រមពាក់)ចំពោះការរក្សាទុកយានយន្ត និងផាកពិន័យ បានផាកពិន័យ ចំនួន១៣៣គ្រឿង នៅសល់ ចំនួន២៥គ្រឿងនិងទុកនៅអធិការខណ្ឌ ចំនួន២៥គ្រឿង (រថយន្ត ចំនួន១២គ្រឿង និងម៉ូតូចំនួន ១៣គ្រឿង)”។

ក្នុងនោះផងដែរលោកវរសេនីយ៍ឯក សំ វិច្ឆិកា បានហាមដាច់ខាតមិនឱ្យមានការអន្តរាគមន៍ ក្នុងករណីណាមួយដែលមានការអន្តរាគមន៍ពាក់ព័ន្ធការល្មើសច្បាប់ចរាចរណ៍ផ្លូវគោក ជាពិសេសអ្នកបើកបរទទួលទានជាតិស្រវឹង និងធ្វើរបាយការណ៍ជូនថ្នាក់ដឹកនាំ។

ជាមួយគ្នានោះលោកអ្នកនាំពាក្យបានអំពានាវដល់ប្រជាពលរដ្ឋដែលធ្វើដំណើរនៅតាមដងផ្លួវសាធារណៈ ត្រូវមានការចូលរួមគោរពច្បាប់ចរាចរណ៍ផ្លូវគោកឱ្យបានគ្រប់គ្នា ជាពិសេសនៅក្នុងរាជធានីភ្នំពេញ ដោយអត្រាគ្រោះថ្នាក់ចរាចរណ៍មានបញ្ហាកើនឡើងនៅពេលយប់។ ដូច្នេះ ប្រជាពលរដ្ឋត្រូវមានការប្រុងប្រយ័ត្នឱ្យបានខ្ពស់ និងកុំពិសារគ្រឿងស្រវឹងនៅពេលបើកបរ ៕