ថ្នាក់ដឹកនាំ និងក្រុមការងារយេនឌ័រ តំបន់ប្រតិបត្តិការសឹករងកំពង់ធំ ឧបត្ថម្ភសម្លៀកបំពាក់កីឡា និងប៊ិចសៀវភៅ រជូនសិស្សានុសិស្ស នៅសាលាបឋមសិក្សាក្រចាប់ ក្នុងក្រុងស្ទឹងសែន

ភ្នំពេញ៖ នៅព្រឹកថ្ងៃទី២៩ ខែមករា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងលោកជំទាវ បានដឹកនាំសហការីក្រុមការងារយេនឌ័រ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ នាំយកសម្លៀកបំពាក់កីឡា ចំនួន ៣៦សម្រាប់ និង ប៊ិច សៀវភៅសរសេរ ចំនួន ១២០ ក្បាល ទៅឧបត្ថម្ភជូនសិស្សានុសិស្សនៅសាលាបឋមសិក្សាក្រចាប់ ស្ថិតនៅក្នុងសង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ។

ឧត្តមសេនីយ៍ទោ សោម ស៊ុន បានថ្លែងថា ដោយមានសំណូមពរពីលោកគ្រូ អ្នកគ្រូ និងសិស្សានុសិស្ស ដែលជាក្រុមកីឡាក្នុងសាលាបឋមសិក្សាក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ដែលត្រូវត្រៀមប្រកួតកីឡានៅថ្នាក់ខេត្ត និងនៅថ្នាក់ជាតិ នៅពេលខាងមុខ ហើយលោកគ្រូ អ្នកគ្រូ និងសិស្សានុសិស្ស មានការខ្វះខាតក្នុងការដោះស្រាយសម្លៀកបំពាក់កីឡា ជូនក្មួយៗសិស្សានុសិស្ស ដែលត្រូវត្រៀមទៅប្រកួតនៅពេលខាងមុខ។ ទើបថ្ងៃនេះក្នុងនាមថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ រួមជាមួយសហការី នៃក្រុមការងារយេនឌ័រ បានរួមគ្នាចូលរួមថវិកា ដើម្បីទិញនិងបោះពុម្ពសម្លៀកបំពាក់កីឡា ជូនក្មួយៗសិស្សានុសិស្សតាមសំណូមពររបស់លោកគ្រូ អ្នកគ្រូ នៅពេលនេះ ដើម្បីក្មួយៗទាំង៣៦ នាក់ បានឡើងទៅប្រកួតកីឡានៅថ្នាក់ខេត្តនិងថ្នាក់ជាតិ តាមកម្មវិធីប្រកួតនៅពេលខាងមុខនេះ ហើយនិងបានជួយឧបត្ថម្ភប៊ិច និងសៀវភៅសរសេរចំនួន ១២០ក្បាល ជូនសិស្សានុសិស្សដែលបានចូលរួមក្នុងពិធីនេះផងដែរ ។

អ្នកគ្រូ នង ចន្ធី ជានាយិកាសាលា តំណាងឲ្យសិស្សានុសិស្ស នៃសាលាបឋមសិក្សាក្រចាប់ សង្កាត់អាចារ្យលាក់ ក្រុង ស្ទឹងសែន ខេត្តកំពង់ធំ បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះឯកឧត្តម សោម ស៊ុន មេបញ្ជាការតំបន់ប្រ តិបត្តិការសឹករងកំពង់ធំ និងលោកជំទាវ ក្រុមការងារយេនឌ័រ ព្រមទាំងសហការី នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានយកចិត្តទុកដាក់ឧបត្ថម្ភសម្លៀកបំពាក់កីឡា ជូនដល់សិស្សានុសិស្សនៅពេលកន្លងមក ក៏ដូចជានៅពេលនេះ ដើម្បី ត្រៀមទៅចូលរួមប្រកួតកីឡានៅថ្នាក់ខេត្ត និងនៅថ្នាក់ជាតិ នៅពេលខាងមុខ នឹងបានជួយឧបត្ថម្ភ ប៊ិច និងសៀវភៅសរសេរ ជូនសិស្សានុសិស្សដែលបានចូលរួមក្នុងពិធីនេះផងដែរ ។ យើងខ្ញុំសូមគោរពជូនពរឯកឧត្តម លោកជំទាវ លោក លោកស្រីទាំងអស់ សូមទទួលបាននូវពុទ្ធពរទាំង៤ប្រការ កុំបីឃ្លៀងឃ្លាតឡើយ។