រាជរដ្ឋាភិបាលកម្ពុជា គិតគូរយកចិត្តទុកដាក់ ទាំងអ្នកចិញ្ចឹមសត្វ និងតម្លៃសាច់នៅលើទីផ្សារ ធ្វើយ៉ាងណាកុំឱ្យឡើងថ្លៃ

ភ្នំពេញ៖ សម្តេចមហាបវរធិបតី ហ៊ុន​ ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាល បានគិតគូរយ៉ាងយកចិត្តទុកដាក់ ទាំងបងប្អូនអ្នកចិញ្ចឹមសត្វ និងតម្លៃសាច់នៅលើទីផ្សារ ដោយធ្វើយ៉ាងណា កុំឱ្យមានការឡើងថ្លែ ។

ក្នុងឱកាសអញ្ជើញបិទសន្និបាតបូកសរុបការងារឆ្នាំចាស់ និងលើកទិសដៅការងារឆ្នាំថ្មី របស់ក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃទី៣០ ខែមករា ឆ្នាំ២០២៤ សម្តេចធិបតី បញ្ជាក់ថា «ពាក់ព័ន្ធនឹងការនាំចូលសាច់បង្កក ដែលកន្លងទៅប្រជាកសិករ យើងមួយចំនួនបានសុំអន្តរាគមន៍ពីរាជរដ្ឋាភិបាល ហើយការងារនេះក្រសួងកសិកម្ម បានដឹកនាំប្រជុំជាមួយវិស័យចិញ្ចឹមសត្វ ខាងវិស័យឯកជន ពិតណាស់ការដោះស្រាយ ការធានា គឺថារាជរដ្ឋាភិបាលត្រូវធានាពីរ ធានាទី១ គឺកសិផល លក់បានថ្លៃល្អ ចំណូលដល់កសិករ ធានាមួយទៀតកុំឱ្យមានអតិផរណាថ្លៃ»។

សម្តេចបន្ថែម ការដោះស្រាយកាត់បន្ថយថ្លៃដើម ក្នុងការផលិតជូនកសិករ ជាអ្វីដែលរាជរដ្ឋាភិបាលខិតខំធ្វើ ដែលកន្លងទៅរាជរដ្ឋាភិបាលបានចេញគោលការណ៍អនុគ្រោះច្រើន ដល់វិស័យកសិកម្ម ដូចជាការមិនយកពន្ធដីកសិកម្ម ការបញ្ចុះតម្លៃអគ្គិសនី និងការផ្តល់នូវការអនុគ្រោះមួយចំនួនទៀត គឺសុទ្ធសឹង ដើម្បីជួយដល់វិស័យមានផលចំណេញ ៕